Վարչապետն ասում էր, որ արցախցիների կոմունալ ծախսերը տվել են․ որպես արցախցի հայտարարում եմ՝ իմ կոմունալ ծախսերը ոչ ոք չի տվել

Արդեն երրորդ օրն է, որ մենք այստեղ հավաքվում ենք։ Առաջին երկու օրը ցույց է եղել։ Պահանջները եղել են Արցախի կարգավիճակն ու Հայաստանի Հանրապետությունում ապաստան գտած փախստականների կարգավիճակը։ Այս մասին ՀՀ կառավարության մոտ լրագրողների հետ զրույցում ասաց Հադրութ քաղաքի բնակիչ Արթուր Ստեփանյանը։

Նրա խոսքով՝ այս երկու օրվա ընթացքում իրենց որևէ մեկը Կառավարությունից չի մոտեցել։ Ավելին, զարմացած են, որ թե՛ ՀՀ-ի, թե՛ Արցախի Մարդու իրավունքների պաշտպանները, թե՛ ԱԺ-ում Մարդու իրավունքների հանձնաժողովի նախագահը, թե՛ Միգրացիոն ծառայությունը, որևէ կերպ չեն արձագանքել, չեն մոտեցել և չեն հարցրել, թե ինչ խնդրով ենք այստեղ։

«Բայց մեր խնդիրն արդեն 2 տարի է՝ անորոշ է։ Մենք ՀՀ-ում ենք։ Մեզ որևէ մեկը չի մոտենում ու ասում՝ ո՞վ եք, ի՞նչ եք ու որտեղի՞ց եք եկել։ Մենք բազիմս ներկայացրել ենք մեր խնդիրները։ Փորձում են ինչ-որ ձև կարգավիճակ տալ, այսպես ասած՝ տեղեհանվածներ։ Բայց թե ինչ պայմաններով են տեղահանել, թե ում հետ են պայմանավորվել, որ տեղահանել են․․․ Այսպիսի հարցեր են, որոնք մեզ համար անհասկանալի են ու մեզ համար թիվ մեկ հարցն է այսօր»,-նշեց Հադրութի բնակիչը։

Փոխհատուցումների հետ կապված հարցին, Ստեփանյանը նշեց, որ այո՛, վարչապետն ասել է, որ բյուջեն կրկնապատկել են, Արցախի Հանրապետության կամ արցախցիների կոմունալ ծախսերը տվել են։ Սակայն, Ստեփանյանը հայտարարեց, որ իր կոմունալ ծախսերն ինքն է տվել։ 

«Ես կարող եմ փաստերով, չեկերով ցույց տալ, իմ կոմունալ ծախսերը ոչ ոք չի տվել։ Ու դաժե, որ ասում է ՀՀ քաղաքացիների վճարած հարկերի միջոցով, դա արդեն չգիտեմ, վապշե ի՞նչ է նշանակում։ Դա միայն կապում եմ նրա հետ, որ լարվածություն է ստեղծում»,-նշեց Հադրութի բնակիչը։