ԳՇ պետը կլինի ՊՆ առաջին տեղակալը, բայց չի փոխարինի ՊՆ-ին․ Պապիկյանը մանրամասներ է ներկայացնում նոր փոփոխությունների մասին

Այսօր Ազգային ժողովի հերթական նիստի ժամանակ ՀՀ պաշտպանության նախարար Սուրեն Պապիկյանն ԱԺ քննարկմանը ներկայացրեց «Պաշտպանության մասին» օրենքում և հարակից մի շարք օրենքներում նախագծերի փաթեթը երկրորդ ընթերցմամբ և ամբողջությամբ ընդունելու նախագծերը։

Ըստ այդմ՝ նորովի են շարադրվում պաշտպանության ոլորտում Կառավարության լիազորությունները, դրանցում առանձին սահմանվում են զորահավաքային պատրաստության և զորահավաքի ոլորտում իրավասությունները, Անվտանգության խորհրդի կողմից ընդունվող մի շարք ծրագրեր և պլաններ ներառվում են ՀՀ պաշտպանության պլանում, խմբագրվում և հստակեցվում են Պաշտպանության նախարարության, Զինված ուժերի Գլխավոր Շտաբի, Պաշտպանության նախարարի և Գլխավոր շտաբի պետի լիազորությունների շրջանակը։ Զինված ուժերի ապահովումների գործընթացում Պաշտպանության նախարարությանն են վերապահվում բոլոր տեսակի նյութատեխնիկական միջոցների, պահեստային տնտեսությունների կառավարման և կենտրոնացված բեռնափոխադրումների կազմակերպման գործառույթները, Զինված ուժերի կարիքների համար գնումների գործընթացների իրականացման ամբողջ համալիրը։ Զինված ուժերի Գլխավոր Շտաբի պետն ի պաշտոնե նախատեսում է որպես Պաշտպանության նախարարի առաջին տեղակալ, որը սակայն չի հանդիսանալու Պաշտպանության նախարարին փոխարինող պաշտոնատար անձ։ Ինչպես նաև այդ կապակցությամբ համապատասխան առանձնահատուկ կարգավորումներ են կատարվում նաև պետական կառավարման համակարգը կանոնակարգող մի շարք օրենքներում։ 

Պապիկյանի խոսքով՝ սույն նախագծերի փաթեթը միտված է Պաշտպանության նախարարությունում, Զինված ուժերում կառավարումը դարձնել ավելի արդյունավետ։ 

«Իհարկե, այստեղ էական է նաև ուղղաձիգ կառավարման գոյությունը, որը բերելու է նրան, որ մենք կարողանալու ենք առաջին ձեռքից մանրամասն քաջատեղյակ լինել մեր կողմից իրականացվող քաղաքացիական վերահսկողությանը»,- նշեց Պապիկյանը և հավելեց, որ երեկ այդ թեմայով նաև բովանդակալից քննարկում են ունեցել։