Աննա Հակոբյանի այցը Սյունիք մտահոգիչ է և նախազգուշացնող (լուսանկարներ)

Աննա Հակոբյանն արդեն մի քանի օր է՝ շրջայց է կատարում Սյունիքի մարզում։ Իհարկե, նրա այցը Սյունիք՝ ինքնանպատակ չէ․․․

Մամուլի պաշտոնական հաղորդագրությունների մեջ հստակ և համոզիչ չի բնութագրվում, թե ինչու է նա այնտեղ․․․ նշվում է միայն, որ Հակոբյան Աննան Սյունիքում այցելել է Կապանի ժամանակակից արվեստի թանգարան, «Զանգեզուր» կենսոլորտային համալիր» ՊՈԱԿ, «Սոսու պուրակ», Ներքին Հանդ և Շիկահող գյուղերի մերձակա տարածքներ, գիշերել է Հալիձորի «Հարսնաձոր» հյուրանոցային համալիրում ու եղել մարզի էլի որոշ վայրերում։ Եվ ամեն տեղ, ուր նա եղել է, ուսումնասիրել է տարածքն ու լուսանկարվել․․․

Կարելի է կռահել, թե ինչն է «առաջին տիկնոջ»-ը տարել Սյունիք, հատկապես երբ նրա այս շրջայցն ու ֆոտոսեսիան հիշեցրեց ոչ վաղ անցյալում նրա՝ Արցախ կատարած շրջագայության մասին։

Այն ժամանակ Աննա Հակոբյանը մի բովանդակալից ֆոտոշարք էր ներկայացրել Արցախի տարբեր շրջաններից։ 

Շատ լրատվական կայքեր, այդ թվում նաև` NEWSPRESS.am—ը, տեղադրել էին Հակոբյանի ֆոտոշարքը՝ վերահրապարակելով նաև համապատասխան տեքստը։ Հրապարակումից րոպեներ անց Աննա Հակոբյանի աշխատակազմից խմբագրություն զանգահարեցին և խնդրեցին հանել նյութը՝ պատճառաբանելով, թե վրիպակ կա՝ կշտկեն և արդեն կարող ենք հրապարակել։ Ասացին նաև, որ բոլոր լրատվամիջոցներին զգուշացրել են․․․

Բոլորը հանել էին նյութը, սակայն շտկումն այդպես էլ չեղավ, ու նկարներն այլևս չտեղադրվեցին։ Չնայած դրան, շատերը հասցրին այդ կարճ ընթացքում պահպանել այդ ֆոտոշարքից նկարներ։

NEWSPRESS.am—ը ներկայացնում է դրանցից մի քանիսը․

Ներկայացված նկարներում, ինչպես նաև այն նկարներում, որոնք այն ժամանակ հրապարակվել էին, Աննա Հակոբյանը պատկերված է բոլոր այն վայրերում, որոնք այսօր հանձնվել են ադրբեջանցիներին։ 

Ասել կուզի՝ այցը նախազգուշացում էր և հրաժեշտ էր նշանակում․․․

Սա, իհարկե, խորը մտածելու տեղիք է տալիս, հատկապես, երբ Սյունիքի մարզում՝ մասնավորապես Ներքին Հանդ և Շիկահող համայնքների հատվածում, թշնամական առաջխաղացում կա․․․ բացի այդ, իշխանությունները՝ ամենաբարձր մակարդակով, իսկ ավելի կոնկրետ՝ Աննա Հակոբյանի վարչապետի աթոռին նստած ամուսնու՝ Նիկոլ Փաշինյանի շուրթերով, ամեն պատեհ և անպատեհ առիթ օգտագործում է հայտարարելու համար, թե իբր այդ տարածքներն ադրբեջանցիներինն են ու պետք է նրանք վերադառնան․․․

Այս համատեքստում, Աննա Հակոբյանի ձեռքը սեղմելուց, նրան ծաղկեփնջերով դիմավորելուց ու նրանից որևէ բան խնդրելուց առաջ, լավ կլիներ տեղի բնակիչները մտածեին, որ արցախցիների նման, իրենց ոտքի տակից էլ է հողը փախչելու, քանի որ Աննա Հակոբյանն է դրա վրայով քայլել․․․

Ինքը՝ Հակոբյան Աննան, իր այցի ժամանակ ակնարկել է, որ կառավարությունն ամեն բան անում է՝ «խաղաղության օրակարգի» հաստատման համար, իսկ «խաղաղությունը» բառացիորեն երեկ կրակում էր Ելփին գյուղի ուղղությամբ:

Չնայած կարծես թե դա այնքան էլ չի հուզում Ներքին Հանդի բնակիչներին։ Նրանք խնդրել են իրենց մեկ օրով տրամադրել փոխադրամիջոց, որպեսզի գյուղի կանանց համար շրջայց կազմակերպվի Հայաստանի տեսարժան վայրերից որևէ մեկում։ Աննա Հակոբյանն էլ խոստացել է․․․

Կհասցնեն շրջագայել, թե ոչ՝ պարզ չէ․․․ ակնհայտ է, որ շատ մոտ ապագայում հնարավոր է գյուղացիները չհասցնեն անգամ փոխադրամիջոց գտնել ադրբեջանցիներից փախչելու համար։

Չի բացառվում, որ Ներքին Հանդի տարածքում արված այս լուսանկարները լինի վերջինը նրանց համար․․․

Արմինե Մկրտումյան