Սյունիքում կրքերը եռում են. Սուրեն Պապիկյանը կմեկնի Կապան. «Հրապարակ»

«Հրապարակ» թերթը գրում է.

«Վաղը՝ հուլիսի 10-ին, պաշտպանության նախարար Սուրեն Պապիկյանը կմեկնի Սյունիքի մարզ՝ մարզկենտրոն Կապան։ Պապիկյանի այցը պայմանավորված է ոչ թե սահմանային լարումով, որին կրկին ականատես ենք լինում վերջին օրերին, այլ ներկուսակցական հարցերով։ Շաբաթ օրը Կապանում «Քաղաքացիական պայմանագիր» կուսակցության խորհուրդ են ընտրելու։

Ավելի վաղ գրել էինք, որ Կապանում թեժ մրցակցություն է սպասվում, Պապիկյանը, ինչպես նաեւ վարչության մի շարք անդամներ, ըստ Սյունիքի մեր աղբյուրների, ներկա կլինեն գործընթացին եւ այն կվերցնեն իրենց «կոնտրոլի» տակ։ Ավելի վաղ տեղեկացրել էինք, որ ՔՊ-ականների շրջանում խորհրդի նախագահի պաշտոնի համար թեժ մրցակցություն կա։ ԱԺ պատգամավոր Դավիթ Դանիելյանը, որ վարչապետի աշխատակազմի ղեկավար Արայիկ Հարությունյանի մտերիմն ու սանիկն է, հավակնում է ոչ միայն այդ պաշտոնին, այլեւ՝ առաջնորդել մարզի կուսակտիվին։

Ասում են՝ նա մարզպետական հավակնություններ ունի։ Մինչեւ վերջերս նրա մրցակիցը հարազատ զարմիկն էր՝ Նարեկ Բաբայանը, որը նախկինում Սյունիքի փոխմարզպետ էր նշանակվել, իսկ ամիսներ առաջ գործուղվեց ԶՊՄԿ։ Դավիթ Դանիելյանը շուրջ երկու ամիս է` պաշտոններ է խոստանում տեղի կուսակցականներին, փորձում է լուծել նրանց հարցերը, այլ կերպ ասած՝ դասական ընտրակաշառքը փոխարինում է այդ ճանապարհով, որ հենց իրեն ընտրեն մարզային ՔՊ խորհրդի նախագահ։

Բանն այն է, որ կուսակցության բարձրագույն մարմնից՝ վարչությունից հետո խորհուրդն է լինելու այն կառույցը, որի անդամները հնարավորություն կունենան, թեկուզ ձեւականորեն, մասնակցել որոշումների կայացմանը կամ գոնե մոտիկ գտնվել վերեւներին, կարճ ասած՝ համարում են կարեւոր լծակ։ Բացի այդ, խորհրդի նախագահի կարգավիճակը կշիռ ու ազդեցություն է տալիս տվյալ տարածքում։

Մենք տեղեկացանք, որ օրերս մրցակիցների թիվն ավելացել է, կուսակցական խորհրդի նախագահի պաշտոնի համար հայտ կներկայացնի նաեւ Սյունիքի փոխմարզպետ Հայկ Հարությունյանը, որը փոխմարզպետի պաշտոնին նշանակվել է այս տարվա մայիսին՝ կալավանցի Ռոբերտի` Ռոբերտ Ղուկասյանի՝ մարզպետ նշանակվելուց եւ Կարո Ավանեսյանին փոխմարզպետի պաշտոնից հեռացնելուց հետո։

Հարությունյանը մինչ այդ աշխատել է մարզպետարանի կրթության վարչությունում, կարելի է ասել՝ դե ֆակտո վարչության պետն է եղել, որը համակարգել է ՔՊ-ի օգտին ձայնահավաքության գործընթացը, դպրոցի տնօրեններին է «կուրացիա» արել, Փաշինյանի մարզային այցերի «մասովկայի» հարցն է լուծել եւ այլն։ Նա նաեւ Դավիթ Դանիելյանի ընկերն է։

Տարածքային խորհուրդների ընտրիչների թիվը հասնում է մոտ 50-70-ի։ Սակայն մարզում վերջին շրջանում ընդգծված խմբավորումներ են ձեւավորվել, եւ բոլորը վստահ են, որ հաղթելու է այն թեկնածուն, որը լծակներ ունի եւ կարող է մյուս կուսակցականներին օգտակար լինել։ Հակառակ պարագայում, եթե ընտրություններին որոշիչ լիներ առաջադրված թեկնածուների վարկանիշը, ապա, մեր աղբյուրի կարծիքով, ոչ մեկն էլ Կապանում ձայն չէր ստանա` ո՛չ Դանիելյանը, ո՛չ Հարությունյանը եւ ո՛չ էլ Բաբայանը սիրված չեն։ Առաջինը հայտնի է որպես ձախողումների սիմվոլ, երբ պարտվեց Կապանի քաղաքապետի ընտրություններում։

Երկրորդը համարվում է իշխանությունների մոլի կամակատարը, իսկ Նարեկ Բաբայանի մասին մեր աղբյուրն այսպես ասաց․ «Եթե սիրեին, փոխմարզպետի պաշտոնից չէին հանի ու տանեին ԶՊՄԿ։ Բաբայանը մարդկանց հետ շփվելու խնդիր ունի»։ Ի դեպ, մարզից ընտրված ՔՊ-ական պատգամավորները, գրեթե առանց բացառության, գտնվում են վարչապետի աշխատակազմի ղեկավար Արայիկ Հարությունյանի «կուրացիայի» տակ եւ պրոպագանդում են Դավիթ Դանիելյանի թեկնածության օգտին։ Նրանք խնդիր են դրել՝ եթե մարզային բոլոր խորհուրդներում կարողանան իրենց ցանկալի թեկնածուներին անցկացնել, ապա կմեկուսացնեն մարզպետ Ղուկասյանին, որի հետ առաջին իսկ օրվանից չեն կարողանում հարաբերվել, չեն մարսում, որ անկուսակցական եւ ոչ թիմային Ղուկասյանը ղեկավարում է մարզը։

Ի դեպ, երեք օր Սյունիքում գտնվող Աննա Հակոբյանին Սյունիքից պատգամավոր ընտրված ՔՊ-ականները չեն ուղեկցել։ Պատճառն այն է, որ նրա այցի առաջին պահից մինչեւ վերջ, իր բանուգործը թողած, կալավանցին կրկնակոխ հետեւել է տիկնոջը։ Հայաստանում նոր ավանդույթ է ձեւավորվում` պետական պաշտոնյաների եւ դեսպանների լիազորությունների ցանկում կարեւոր կետ է դարձել Աննա Հակոբյանին ուղեկցելը»:

Առավել մանրամասն՝ թերթի այսօրվա համարում