Աննա Հակոբյանի՝ Սյունիք այցը մեծ սիմվոլիկա ուներ․ նա ֆոտոսեսիա էր կազմակերպել Արցախի այն հատվածներում, որոնք հանձնվեցին թշնամուն․ Ղազարյան

Ես կարծում եմ, որ տիկին Աննա Հակոբյանը Սյունիքում կազմակերպել էր ուսումնավարժական վարժանքներ՝ Ադրբեջանի առաջին տիկին և փոխնախագահ Մեհրիբան Ալիևայի՝ Սյունիք այցը նախապատրաստելու համար։ Ես վստահ եմ, որ նա ապրում է նրա կերպարով ներշնչված և հեռակա սիմպատիա ունի նրա նկատմամբ։ Այս մասին «Հայելի» ակումբում ասաց ՍԴ աշխատակազմի նախկին ղեկավար, Լեհաստանում ՀՀ նախկին դեսպան Էդգար Ղազարյանը։ 

Ղազարյանը հիշեցրեց, որ Աննա Հակոբյանը պատերազմից առաջ Մեհրիբան Ալիևային հրավիրել էր նաև Շուշի՝ համատեղ թեյախմության և մուղամ լսելու՝ ընդհանուր նախասիրությունները հաշվի առնելով։ Տիկին Մեհրիբանն ընդունել էր Հակոբյանի հրավերը և այցելել Շուշի, բայց տիկին Աննա Հակոբյանը խախտել էր հյուրընկալության տարրական կանոնները և ներկա չէր գտնվել այցի ժամանակ։ 

«Եթե դու հրավիրում ես, ուրեմն՝ պիտի ներկա գտնվես, որպեսզի ընդունես քո հյուրին, և ինքդ թեյ հյուրասիրես և այլն, և այլն։ Բայց տիկին Մեհրիբանը Շուշի էր եկել իր ամուսնու և դստեր հետ։ Տիկին Աննա Հակոբյանը, սակայն էնտեղ չէր։ Ի դեպ ձեզ ասեմ, որ մինչև Շուշի հրավիրելը, տիկին Աննա Հակոբյանը ֆոտոսեսիաներ էր կազմակերպել Արցախի այն հատվածներից, որոնք բոլորը, առանց բացառության, հայտնվել են ադրբեջանական վերահսկողության ներքո։ Ֆոտոսեսիաներից մեկը եղել էր Քարվաճառի տաք ջրերը, աղբյուրները, որոնք հանձնվեցին թշնամուն, մյուսը՝ Տիգրանակերտի ամրոցը, որը հանձնված է թշնամուն, մյուսը՝ Շուշին, Շուշիի գորգերի թանգարանը։ Եվ հիմա՝ շատ մեծ սիմվոլիկա կա նրա՝ Սյունիք կազմակերպած այցի հետ կապված։ Այդ այցը լուսաբանել, դրան նշանակություն տալ և առհասարակ վարչապետի տիկնոջ այց, նման բան գոյություն չունի։ Վարչապետի կինը պետական պաշտոն չէ, կարգավիճակ չէ և որևէ արարողակարգային, պաշտոնական, լրատվական նշանակություն դրան չպետք է տալ։ Վարչապետը կարող է ունենալ կին, երեխաներ, աներձագ, բաջանաղ, հոպար, քեռակին, բազմաթիվ ազգականներ, բայց նրանց կյանքի իրադարձությանները որևէ կերպ անդրադառնալ, լուսաբանել, դրանց պետական նշանակություն տալն անմտության դրսևորում է»,- նշեց Ղազարյանը: