Հլը մի հատ խոնարհվի, հլը ժպտա․ Աննա Հակոբյանը Սյունիքում վարժանք կատարեց, թե ինչպես պետք է դիմավորեն Մեհրիբան Ալիևային․ Ղազարյան

Քանի որ այն տեղերը, ուր Աննա Հակոբյանը գնում է, հանձնում են ադրբեջանցիներին, հիմա էլ նրա ամուսինը հայտարարել է, որ կա պատերազմի վտանգ և հայտարարել է, որ այդ պատերազմը կարող է լինել 3 ամսից, 3 տարուց, 30 տարուց, և որ Ադրբեջանն իրավական, լեգիտիմ հիմքեր է ստեղծում նոր պատերազմի համար։ Այս մասին «Հայելի» ակումբում ասաց ՍԴ աշխատակազմի նախկին ղեկավար, Լեհաստանում ՀՀ նախկին դեսպան Էդգար Ղազարյանը։ 

Նրա խոսքով՝ այդ հայտարարության նույն օրն Ադրբեջանի նախագահ Իլհամ Ալիևը Քարվաճառում նոր զորամասի բացման արարողության ժամանակ հայտարարում է, որ Ադրբեջանի հատուկ նշանակության զորամիավորումները, որոնք տեղակայված են այլևս Հայաստանի սահմանին, մեր կողմից ազատագրված, սակայն հիմա օկուպացված շրջաններում, այնտեղ ավելացվում են հատուկ նշանակության զորամիավորումների թվաքանակը շուրջ 2,5 անգամ։

«Ադրբեջանի ԶՈւ-ը համալրվում է այն սպառազինություններով, որոնք կորցրել են պատերազմի ժամանակ, կնքվել են նոր պայմանագրեր՝ նոր սպառազինություններ ձեռք բերելու համար։ Եվ հենց այս հայտարարությունների ֆոնի վրա տիկին Աննա Հակոբյանը կազմակերպում է վարժանք՝ Սյունիքի մարզում, թե համայնքի ղեկավարները,  թանգարանների տնօրենները կամ հասարակական կազմակերպությունները, կանանց խնդիրներով զբաղվող ռեսուրս կենտրոնները և այլն, ինչպես պետք է դիմավորեն Մեհրիբան Ալիևային, եթե նա առաջիկայում այցելի Սյունիք։ Տվյալ դեպքում, ինքը հանդես էր գալիս տիկին Մեհրիբանի դերում, այսինքն՝ պատկերացրեք, որ իմ փոխարեն տիկին Մեհրիբանն է։ Եվ ծաղիկները, որոնք Երևանից հատուկ տարել էին և տվել քաղաքապետերի ձեռքը, որպեսզի նվիրեն տիկին Աննային, իբրև ստուգեն՝ հլը նվիրի, տեսնենք՝ կարողանո՞ւմ ես նվիրել, թե՞ չէ։ Հլը մի հատ խոնարհվի, տեսնենք՝ կարողանո՞ւմ ես խոնարհվես, թե՞ չէ։ Հլը մի հատ ի՞նչ լավ խոսքեր կարող եք ասել, ժպտալ․․․հլը ժպտացեք։ Եվ դա, ինձ թվում է՝ այդպիսի ուսումնավարժական գործընթաց էր»,- նշեց Էդգար Ղազարյանը։ 

Նրա խոսքով՝ եթե, որևէ մեկն իր այս ներկայացրած, թեկուզ սարկազմով հայտարությունների մեջ անլրջություն են տեսնում, ապա հիմա կարող է գնալ Կապան։ Իհարկե, նրանց չի հաջողվի հասնել միջպետական ճանապարհով, որովհետև Գորիսից Կապան հատվածը տիկին Աննա Հակոբյանի և նրա ամուսնու համատեղ ջանքերով վերահսկվում է ադրբեջանցիների կողմից, իսկ Կապան քաղաքի օդանավակայանում կտեսնեն Ադրբեջանի դրոշը, որը Կապանի օդանավակայանից և Սյունիքի մարզպետարանից գտնվում է ընդամենը մի քանի մետր հեռավորության վրա։