Ռիգան եւ լատվիական մյուս քաղաքները հայտարարել են՝ այլեւս չեն կարող Ուկրաինայից փախստականներ ընդունել

Ռիգան եւ լատվիական մյուս քաղաքներն այլեւս չեն ընդունի ուկրաինացի փախստականներին, քանի որ զգալիորեն կրճատվել է  Ուկրաինայից փախստականներին աջակցելու պետական ծրագիրը և  տեղական իշխանություններն այլեւս փող չունեն մարդկանց ապրելու համար։ Այդ պատճառով բազմաթիվ փախստականներ արդեն հիմա  հայտնվում են փողոցում։

ԻՆչպես գրում է «Настоящее время»-ն՝ Ուկրաինայից, հիմնականում օկուպացված տարածքներից,  մոտ 120 փախստական է այժմ ամեն օր գալիս Լատվիա, իսկ  այժմ փախստականները փորձում են մեկնել Եվրոպա կամ վերադառնալ Ուկրաինա, գրում է «Настоящее время»-ն։

Պետությունն այժմ մեկ փախստականի համար օրական հատկացնում է ընդամենը 3,5 եվրո, այդ գումարով  հնարավոր չէ մարդկանց տեղավորել Ռիգայի հյուրանոցներում, հոսթելներում կամ հանրակացարաններում, իսկ քաղաքներն իրենք էլ փող չունեն մարդկանց տեղավորելու եւ կերակրելու համար։ Առայժմ Ռիգայի քաղաքային խորհուրդը թոշակառուներին խոստացել է մեկ ամսով երկարացնել անվճար կացության ժամկետը, սակայն պարզ չէ, թե ինչ կլինի  հետո։

Ֆինանսավորման բացակայության պատճառով փակվելու ենթակա է նաեւ Ռիգայում ուկրաինացի փախստականների աջակցության կենտրոնը, որի մասին արդեն  իսկ հայտարարել է Ռիգայի քաղաքապետը։  Ռիգայի քաղաքային խորհուրդը կոչ է արել արձագանքել տեղի բնակիչներին, ովքեր պատրաստ են տանը տեղավորել փախստականներին՝ նրանց խոստանալով պետությունից փոխհատուցում։ Բայց առայժմ ուկրաինական ընտանիքներին բնակեցնելու ցանկացողները քիչ են։