Ռիո դե Ժանեյրոյում Հիսուս Քրիստոսի արձանը տեսնել երազողները փոթորիկ են բարձրացրել մի բաժակ ջրում. երեսպաշտության շքերթ է

Հայաստանում կառավարման համակարգը միշտ խնդիրներ ունի, որովհետև բոլոր օղակներում ու ժամանակներում կառավարման համակարգի պատասխանատուները փորձում են դուր գալ հասարակությանը՝ ստորադասելով պետության շահը:

Այսպես է նաև հիմա. Հատիս լեռան վրա Գագիկ Ծառուկյանը որոշել է «Հիսուս Քրիստոս» մոնումենտալ համալիր կառուցել. ընթացակարգերը պահպանել է, դիմել է կառավարություն, կառավարությունը քննարկել է բաց նիստում, դեմ արտահայտողներ չեն եղել, և որոշումն ընդունվել է:

Ավելին՝ նախարար Քերոբյանի, ՄԱԿ-ի զբոսաշրջության կոմիտեի նախագահի հետ Հատիսի վրա տեղի է ունեցել հիմնարկեքի արարողություն, մեկ էլ կառավարության նիստին նստած ԿԳՄՍ նախարար Դումանյանը կիրակի գիշերը հիշել է, որ Հատիսը պատմամշակութային հուշարձաններ ունի: Դա էլ, հավանաբար նախարարության աշխատակիցներից մեկը տեսել է սոցիալական ցանցերի քննարկումներից, որ 2008-ից այդ լեռը մշակութային ժառանգության թվում է:

Ինչևէ, սոցիլական ցանցերում Ռիո դե Ժանեյրո գնալու ու Քրիստոսի արձանի մասին երազող ֆեյսբուքահայերի որոշ զանգված դեմ է արձանի կառուցմանը, ոմանք կողմ են, ոմանք այլ շահ են հետապնդում և քաղաքական պատվեր իրականացնում: Ընդդիմադիրներն, օրինակ, լավ է, քննադատության թիրախից ժամանակավոր դուրս կգան՝ հատկապես աշխարհում տեղի ունեցող հեղափոխությունների ֆոնին, երբ մարդիկ օրերի ընթացքում իշխանությունից հեռացնում են անցանկալիներին, իրենք՝ 2 ամիս քայլելուց հետո՝ գնում տուն: Դե իսկ կառավարությունն էլ իսկը առիթ է գտել ֆեյսբուքահայությանը դուր գալու, փոխանակ հանրությանը ներկայացնի ծրագիրը, ներդրումների ծավալը, պոտենցյալ զբոսաշրջիկների թիվն ու աշխատատեղերի քանակը, բայց ոչ. պետք է դուր գալ և ասել՝ բան ենք հիշել, մի՛ կառուցեք:

Ի դեպ, դրան էլ արձագանքն արագ էր, «Գագիկ Ծառուկյան» բարեգործական հիմնադրամից հայտնեցին, որ ոչ մի մշակությաին ժառանգություն չի վնասվի, կճշգրտվեն այդ վայրերը և այլն:

Բայց, միևնույն է, եթե լավ բան է, պետք է դեմ լինել՝ բնավորություն է: Ի՞նչն է խանգարում, որ Հայաստանում էլ Կասկադ-Հյուսիսային պողոտա, Գառնի-Գեղարդից զատ ևս մեկ տեսարժան վայր լինի, անընդունելի է, դուք մի՛ գնացեք:

Քանդելուն դեմ են, կառուցելուն դեմ են, բայց նման բոլոր գործողությունների ու գրառումների տակ սեփական ես-ի շահն է, լավագույն դեպքում՝ փոքրիկ խումբ մենքի...

NEWSPRESS.am