Սա ոչ թե ՆԳՆ վերաստեղծումն է, այլ ստեղծումը․ Կարեն Անդրեասյան

Մեզ համար այսօր իսկապես կարևոր և ուրախ օր է՝ այն իմաստով, որ երկար չարչարված, մեծ աշխատանք պահանջած նախագիծը մոտ է իր լրումին։ Ես ուզում եմ հատուկ ընդգծել, որ Ներքին գործերի նախարարության ստեղծումը շատ կարևոր, մեծ քայլ է մեր երկրի իրավապահ համակարգի համար։ Ընդ որում, ուզում եմ հատուկ շեշտել, որ ոչ թե վերաստեղծումը, այլ նոր նախարարության ստեղծումը։ Այս մասին Ազգային ժողովում ելույթի ժամանակ հայտարարեց ՀՀ արդարադատության նախարար Կարեն Անդրեասյանը։

Նրա խոսքով՝ ինքն ամենևին էլ չի ցանկանում նսեմացնել այն ճանապարհը, որն անցել է ոստիկանությունը, նախկին Ներքին գործերի նախարարությունը, այլ պարզապես ցանկանում է ընդգծել այն կոնցեպտը, որը ներկայացվելու է իր գործընկերների կողմից։ Այն լիովին նոր նախարարության, նոր հայեցակարգի մոտեցում է, որտեղ ոստիկանությունը չի անվանափոխվում ՆԳՆ։ Ոստիկանությունը պահպանելու է իր շատ կարևոր դերակատարումը, սակայն լինելու է սիրտը, կարևոր մասը։

«Մեզ շատ են քննադատել՝ իմ պաշտոնավարման առաջին ամիսներից, ասելով, որ ուշանում է Ներքին գործերի նախարարության ստեղծումը։ Ես այստեղ հատուկ ուզում եմ շեշտել այն մարդկանց աշխատանքը, ովքեր ինձնից առաջ էլ երկար աշխատել են, մասնավորապես մեր հարգարժան Մարդու իրավունքների պաշտպանը։ Հսկայական աշխատանքներ են կատարվել, որպեսզի այս փաթեթը կարողանանք պատրաստ վիճակով ներկայացնել ձեր դատին»,- նշեց Անդրեասյանը և հավելեց, որ ուշացումով ներկայացնելը չի ուշացնի երազանքներն ու նպատակները, որոնք կան այս հայեցակարգի հիմքում։

Անդրեասյանի խոսքով՝ իրենք 0-ից չեն ստեղծելու նախարարություն, այլ վերցնելու են Արտակարգ իրավիճակների նախարարության հենքը։ Եվ այնպիսի մեխանիզմ են դրել, որը լրացուցիչ ծախսեր ու բեռ չստեղծի պետության համար։ Նպատակն էր ոստիկանության եղած ներուժը համակցել քաղաքական մարմնի հետ, որպեսզի կարողանան ստեղծել հետաքրքիր կառույց։ Այդ հարցում մեծ օգնություն են ցուցաբերել նաև միջազգային փորձագետները։

«Ես ուզում եմ շնորհակալություն հայտնել Ալեքսիսին և իր ամբողջ թիմին, ԱՄՆ դեսպանությանը, մեր գործընկերներին»,- նշեց Անդրեասյանը։