«Փեսան սպանվել է, որդին՝ անհետ կորել․ ընտանիքով խրոխտ ընտրել են Նիկոլ Փաշինյանին, ասել, որ նախկիններն են սպանել»․ Նաիրա Զոհրաբյան

Բոլորը պետք է հասկանան, որ հարցն այլևս Նիկոլը չէ, այլ մարդիկ, ովքեր Նիկոլին ընդունում են։ Այս մասին ասուլիսի ժամանակ ասաց նախկին պատգամավոր Նաիրա Զոհրաբյանը, ով ամեն օր հանդիպում է զոհվածների ծնողների։

«Սիսիանում ունենք ծանոթ, որի որդին անհետ կորած է, որի աղջկա ամուսինը սպանվեց պատերազմում, բայց 2021թ․-ին ընտանիքով խրոխտ ընտրել են Նիկոլ Փաշինյանին, հայտարարել, որ փեսային սպանել են նախկինները, որդու անհետ կորելու պատճառը ևս նախկիններն են։ Խնդիրն այլևս Նիկոլի մեջ չէ։ Ճիշտ և գրագետ պետք է աշխատել հասարակության և ծնողների հետ, որոնք այլևս կորցնելու բան չունեն։ Եթե նիկոլական քարոզչությունը շարունակում է իր գործը, ծնողները շարունակելու են մտածել, որ իրենց որդիներին սպանել են նախկինները, երթուղայինների վարորդներն էլ շարունակելու են քննարկել, թե նոյեմբերի 9-ի կործանարար փաստաթուղթը ստորագրել է Նաիրա Զոհրաբյանը»,- ասաց նա։

Նաիրա Զոհրաբյանը հիշեցրեց այն, որ ԱԺ ամբիոնից Փաշինյանը խոստովանեց՝ կարող էին կանխել պատերազմը, ու կլիներ նույն ելքն առանց զոհերի։ 

«Ինչպե՞ս կարելի է հույս դնել վարչապետի, Անդրանիկ Քոչարյանի կամ ՀՔԾ-ի վրա․ ռազմագերիների, անհետ կորածների, զոհվածների ծնողներ, հիմա, երբ Նիկոլը գովում է Բերձորը շրջանցող ճանապարհը, շտապում է իրագործել իր ստորագրածը, դուք հարց չունե՞ք նրան։ Դուք նայե՞լ եք ինքնասպանությունների վերջին վիճակագրությունը։ Թվերը զարհուրելի են։ Իմացեք՝ ովքե՞ր են հիմնականում ինքնասպան լինողները։ Զգալի տոկոս են պատերազմի մասնակիցները։ Երբ անդրանիկքոչարյանները ձեզ կանչում են իրենց աշխատասենյակներ ու ասում՝ հանկարծ չքաղաքականացնե՛ք, բա չեք ուզո՞ւմ հարցը քաղաքականացնել, ասել, որ Նիկոլն առաջին պատերազմից 100-ից ավելի ադրբեջանցու ոսկորներ է հանձնել նրանց»,- նեղսրտած՝ զովածների ծնողներին դիմեց Նաիրա Զոհրաբյանը։