Նիկոլ Փաշինյանը մի հիմարություն է դուրս տալիս ու դա մի օրում լցվում է հասարակության որոշ շերտերի գլուխը․ Էդգար Ղազարյան

Մենք տքնաջան աշխատել ենք ամբողջ կյանքում բարիք ենք ստեղծել ու մեզ հետ տարել ենք հասարակության որոշակի հատվածներին՝ սոցիալական համերաշխություն ցուցաբերելով։ Ասել ենք՝ դե հայ ենք։ Հասարակության այդ հատվածը ո՛չ դպրոցում, ոչ՛ համալսարանում չի սովորել, չի աշխատել, հիմա էլ չի աշխատում ու ոչ էլ ունեցել է այդ ունակությունը։ Առհասարակ բարեվարքություն չունեն։ Բայց ստացվում է, որ նրանք ոչ միայն մեզ հավասար որոշումներ են կայացնում, այլև մի բան էլ ավել, առաջ են անցնում։ Այս մասին «Հայելի» ակումբում ասաց ՍԴ աշխատակազմի նախկին ղեկավար, Լեհաստանում ՀՀ նախկին դեսպան Էդգար Ղազարյանը։

Ղազարյանի խոսքով՝ Նիկոլ Փաշինյանն իր անգրագետ, անդաստիարակ տեղով մի հիմարություն է դուրս տալիս ու մի օրում լցվում է հասարակության այդ շերտի գլուխը։

«Ես զարմանում եմ, բա մեր ասածներն ինչո՞ւ նրանց գլուխը չի մտնում՝ առավոտից իրիկուն խոսում ենք։ Երկու տարի է՝ գյումրեցիների երեխաները գտնվում են անազատության մեջ, ու նրանք ադրբեջանական հեռուստաալիքներով տեսնում են, թե իրենց երեխաները ոնց են դատվում բանտերում։ Արդեն 2 տարի նրանց խաբում են։ Ալեն Սիմոնյանն էլ ասում է, որ նրանք իր համար գոյություն չունեն։ Նիկոլն էլ ասաց, որ երկու ամիս հետո կգան, բայց չեկան։ Մի օր ասաց՝ իմ եղբայրներն են, մյուս օրն ասաց՝ դավաճաններ են։ Մի անգամ էլ ասաց՝ տղուս կտամ, որ իրենց բերեմ։ Խաբելով ոնց ուզում են, մարդկանց հետ վարվում են։ Վերջերս՝ գիշերը ժամը 10-ին, ասաց, որ նրանք գերության մեջ են հայտնվել ռուսական խաղաղապահ ուժերի պատասխանատվության գոտում։ Լույսը հենց բացվեց, գյումրեցիները վեր կացան, գնացին հյուպատոսության շենքի դիմաց ցույց անելու։ Այսինքն՝ բա չե՞ք մտածում ասել՝ իմ երեխան ՀՀ քաղաքացի է, դու ՀՀ վարչապետն ես, ես քեզնից բան չունեմ պահանջելու, հյուպատոսությունից եմ պահանջելո՞ւ իմ երեխուն։ Կապ չունի՝ երբ ու որտեղ․ այդ մարդիկ քո երկրի քաղաքացիներն են։ Բա էդքան, որ ՌԴ նախագահի հետ հանդիպում ես, ի՞նչ ես խոսում։ Դա ՌԴ-ի պատասխանատվության հա՞րցն է։ Ու այդ մարդկանց մոտ ոչ մի անալիտիկ մտածողություն չկա, որ ասեն՝ արա՛, դու էդ ի՞նչ ես խոսում»,- նշեց Ղազարյանը ու կրկին զարմացավ, թե ինչպես են մարդիկ հավատում ու ընդունում Փաշինյանի ասած հիմարությունները։