Ամերիկյան հետախուզության պետի այցն իշխանությունը փորձում էր կոծկել․ Գեղամ Մանուկյան (տեսանյութ)

Սա արտառոց է: Անդրադառնալով ԱՄՆ կենտրոնական հետախուզական գործակալության տնօրեն Ուիլյամ Բըրնսի այցին Հայաստան՝ լրագրողների հետ զրույցում ասաց ընդդիմադիր պատգամավոր Գեղամ Մանուկյանը։

«Եվս մեկ արտառոց դրվագ կա՝ ամերիկացի պաշտոնյան հանդիպել էր ԱԽ քարտուղարի և Նիկոլ Փաշինյանի հետ, նրա կոլեգայի՝ ԱԱԾ տնօրենի հետ առանձին հանդիպում չէր եղել: Ես զերծ կմնամ քաղաքագիտական տարբեր վերլուծություններից՝ ամենացնորամիտներից, թե իբր ամերիկացի պաշտոնյայի այցով փրկվեցին Հայաստանը, Սյունիքը և այլն»,- ասաց պատգամավորը։

Նրա դիտարկմամբ, այս իշխանությունը փորձում էր կոծկել՝ մինչև տեղեկատվական արտահոսք եղավ, արդեն սա խոսուն փաստ է՝ հաշվի առնելով նաև այն, որ, օրինակ, Ռուսաստանի Դաշնության արտաքին հետախուզության ծառայության տնօրեն Սերգեյ Նարիշկինի՝ Հայաստան այցի մասին նախապես ազդարարվել էր:

Ինչ վերաբերվում է խորհրդարան վերադառնալուն, ապա ընդդիմադիր պատգամավորը նկատեց, որ դա իրենց օրակարգում չկա։

«Այլ հարց, որ Հայաստանի առջև ծառացած բազմաթիվ հիմնախնդիրների շուրջ գործունեություն ծավալելը մեր պարտականությունն է: Ես մի դրվագ ասեմ․ անցնող շաբաթվա ընթացքում Սեյրան Օհանյանի հետ այցելել ենք Սյունիք, Ներքին Հանդ, որտեղ թշնամին առաջխաղացում էր ունեցել, այցելել ենք Տավուշի մարզ, անվտանգության առումով որոշ մտահոգիչ տարրեր կան, որոնք չեմ բացահայտի, սակայն պատգամավորական հարցապնդումներ եմ անելու և ՊՆ, և ՏԿԵ նախարարություն, և այլ գերատեսչություններ»,- ասաց նա:

Մանրամասները՝ տեսանյութում