Պարոն Թոռնիկը հավակնում է դառնալ Ագրարային համալսարանի միակ ուսանողը. Էդգար Ղազարյան

Պարոն Թոռնիկը հավակնում է դառնալ ագրարային համալսարանի միակ ուսանողը: Այս մասին ֆեյսբուքյան իր էջում գրել է ՍԴ աշխատակազմի նախկին ղեկավար, Լեհաստանում ՀՀ նախկին դեսպան էդգար Ղազարյանը:

«2022-2023 թվականների ուսումնական տարվա ընդունելության արդյունքներով Հայաստանի ազգային ագրարային համալսարանին հատկացված 930 տեղերից ընդունվել է ընդամենը 38 դիմորդ, որից 23-ը (76%-ը)՝ Ագրոբիզնես և ֆինանսներ մասնագիտությամբ։ 18 մասնագիտություններից 11-ում որևէ դիմորդ չի ընդունվել։ ՈՉ մի ուսանող չի ընդունվել Սննդամթերքի անվտանգություն, Անասնաբուժական-սանիտարական փորձաքննություն մասնագիտություններով, ինչը համապատասխան պետական մարմնի անգործության և անպիտանության հետևանքներից է։ Խմորման արտադրության տեխնոլոգիա և գինեգործություն մասնագիտությամբ ընդունվել է միայն մեկ ուսանող, ինչը նշանակում է, որ այս տարի այդ մասնագիտությունը չի կայանա։ Գինեգործությունը Հայաստանում հասցվել է այդ աստիճանի ողբերգական վիճակի։ Հայաստանի բոլոր հողատարածությունները կաթիլային եղանակով ոռոգելի դարձնելու Նիկոլ Փաշինյանի ծրագրերին լուրջ է վերաբերվել և որոշել է այդ գործին միանալ 0 ուսանող։

Սա նշանակում է, որ Հայաստանի ազգային ագրարային համալսարանի ուսանողական խորհրդի նախագահ պարոն Թոռնիկը, որի ստորությունների և ապօրինությունների հետևանքով քաղաքական հալածանքների է ենթարկվում ազնիվ, հայրենասիր, առաքինի և պարկեշտ մի մարդ՝ Ավետիք Չալաբյանը, կարող է դառնալ այդ համալսարանի եզակի ուսանողներից մեկը, կամ գուցե միակը։ Հետաքրքիր է, թե այդ դեպքում որտեղի՞ց նա պետք է գտնի 2000 ուսանող, հատը 1000 դրամով վաճառելու և իր թրաֆիքինգն իրագործելու համար»: