«Սեզոնային» Իշխան Սաղաթելյանի պիտանելիության ժամկետն անցել է․․․ նա ընդդիմության խոտանն է

Այն պահից, երբ «Հայրենիք» կուսակցության նախագահ և ԱԺ «Պատիվ ունեմ» խմբակցության ղեկավար Արթուր Վանեցյանի կողմից հայտարարված նստացույցի «ղեկը» շատ սահուն անցավ ԱԺ փոխնախագահ, «Հայաստան» խմբակցության անդամ, ՀՅԴ-ական Իշխան Սաղաթելյանի ձեռքը, շատերը հասկացան՝ շարժումը դատապարտված է տապալման։

Այն, որ Իշխան Սաղաթելյանը շարժման համար ո՛չ թե խթան, այլ խցան է՝ NEWSPRESS.am-ն այդ մասին տարբեր առիթներով նշել է։ Այդ հարցը, վարագույրների հետևում, անգամ յուրայիններն են քննարկել, բայց չեն համարձակվել կամ պարզապես չեն ցանկացել խոսել այդ մասին բարձրաձայն։ 

Փաստն այն է, որ այսօր շարժումը մարել է ու մարել է ո՛չ թե նրա համար, որ մարդիկ «ներել են» Նիկոլ Փաշինյանին՝ հայրենիք հանձնելու և 5000 քաջերին զոհելու համար և այլևս չեն ուզում հեռացնել նրան իշխանությունից, այլ միայն այն բանի համար, որ «Դիմադրության» շարժման լիդերը ևս խաբեբա դուրս եկավ․ համենայն դեպս նա խաբեց իր խոսքին հավատացող ու իր հետևից ամեն երեկո փողոցներով գնացող երթի մասնակիցներին։

Վրանները Ֆրանսիայի հրապարակում տեղադրվեցին ամենաանձրևային օրերին։ Այդ ժամանակ էր, որ Իշխան Սաղաթելյանը հայտարարեց, թե՝

«Ո՛չ անձրևը, ո՛չ արևը ու առհասարակ ոչ մի բան չի խանգարելու մեր շարժմանը»․․․

Սակայն պարզվեց՝ «матч состоится в любую погоду» ասույթը Սաղաթելյանի դեպքում չի գործում։

Այս խոսքերից 2 ամիս է անցել։ Այդ ընթացքում արդեն Սաղաթելյանը մի քանի անգամ հայտարարել է՝ «Եղանակային պայմանները հաշվի առնելով՝ այսօր հանրահավաք և երթ չի լինի, վաղը շարունակում ենք»․․․

Այն ժամանակ իբր անձրևն էր խանգարում, իսկ այժմ էլ արևն է խանգարում Սաղաթելյան Իշխանին, ու հիմա էլ նա հայտարարում է, թե ««Դիմադրություն» շարժման հուլիսի 21-ի հանրահավաքը 1 շաբաթով հետաձգվում է՝ սպասվող աննախադեպ շոգ եղանակի պատճառով»․․․

(Ի դեպ, Սաղաթելյանի նշած օրերին ջերմաստիճանը 5-ով կիջնի․․․ սա ի միջի այլոց)

Իշխան Սաղաթելյանի պատճառով, հայրենիքի փրկության համար դուրս եկած մարդկանց շարժումը սկսեցին ծաղրել նրանք, ովքեր վերջինն իրավունք ունեն խոսելու՝ անվանելով այն «սեզոնային»․․.

Սաղաթելյանի պատճառով, մարդիկ սկսեցին հիասթափվել, կոտրվել։

Սաղաթելյանը «քաշեց» նաև իր ընդդիմադիր գործընկերներին։

Սաղաթելյանը մաշեց ժողովրդի պոտենցյալ ուժը, պայքարելու համառությունն ու հավատը՝ վաղվա օրվա հանդեպ, քանի որ պարզվեց, որ երկիրը փրկելու ու Նիկոլին հեռացնելու համար Սաղաթելյանին խանգարում են ոչ թե անձրևն ու արևը, այլ մանդատից ընդմիշտ զրկվելու վախը։

Անգամ ԱԺ նախագահ Ալեն Սիմոնյանն էր հեգնել, թե՝ «լավ կլիներ, որ Սաղաթելյանն ասեր՝ ընդունել եմ իմ պարտությունը, հիմա ես դնում եմ իմ մանդատը»․․․

Սաղաթելյանին կարելի է հիշեցնել նաև իր սպառնալիքը՝ ուղղված ՊՊԾ պետ Սարգիս Հովհաննիսյանին, նրա լկտի արարքի համար։

«Սաքո, ես քեզ խոստանում եմ՝ ուսադիրներդ պոկելու եմ»,- ասել էր Սաղաթելյանը։ Նրան իհարկե չհաջողվեց «պոկել Սաքոյի ուսադիրները», փոխարենը ինքը զրկվեց «ուսադիրներից»․․․

Այնպես որ, «սեզոնային» Իշխան Սաղաթելյանի պիտանելիության ժամկետն անցել է․․․ նա ընդդիմության խոտանն է․․․

Արմինե Մկրտումյան