Ո՞ւմ է ձեռնտու «Հայաստան» դաշինքի անունից թռուցիկներ տարածելով՝ բոլորին իրար դեմ հանել. 10 տարի Երևանում ապրող ուկրաինուհի (տեսանյութ)
Ապատեղակատվությունը ուկրաինական պատերազմի մասին շատ է, դրա դեմ պայքարել ոչ հնարավոր է, ոչ էլ իմաստ ունի, նրանք, ովքեր կարողանում են օգտվել տարբեր աղբյուրներից, շատ լավ հասկանում են իրականությունը, և միայն մարդիկ, ովքեր բացառապես ռուսական լրատվամիջոցներին են հետևում, հայտնվում են մոլորության մեջ։ Հաղորդում է «Ամերիկայի ձայնը»։
Հայաստանի փողոցներում թռուցիկներ են հայտնվել «Զապորոժյեն Ռուսաստանն է» գրությամբ։
Դա զառանցանք կարող է թվալ։ Հայատառ այդ թռուցիկներում շեշտվում է նաև, որ Հյուսիսային Ղազախստանը լինելու է Ռուսաստան։ Ո՞վ է տարածել այս թռուցիկները՝ հայտնի չէ։ Թռուցիկների վրա ԱԺ ընդդիմադիր խմբակցության «Հայաստան» դաշինքի անունն է և տարբերանշանը, բայց «Հայաստան» դաշինքը հերքում է իր մասնակցությունն այս քարոզչական արշավին։
«Այո, հանդիպել եմ ահազանգերի, որ «Հայաստան» դաշինքի անունից տարածվում են թռուցիկներ։ Մենք դա որակում ենք որպես սադրանք։ Միանշանակ հայտարարում եմ, որ դրանք տարածված չեն «Հայաստան» դաշինքի անունից, կեղծիք են ամբողջությամբ»,- ասում է ԱԺ «Հայաստան» դաշինք խմբակցության պատգամավոր Ագնեսա Խամոյանը։
