Արցախում կասկածում են մեղադրանքին. «Հրապարակ»
«Հրապարակ» թերթը գրում է.
«Արցախի Հանրապետության հռչակման օրը Ստեփանակերտ էին այցելել պատգամավորներ Հայաստանի Ազգային ժողովի ընդդիմադիր երկու խմբակցություններից, եւս երկու պատգամավոր՝ «Քաղպայմանագրից»՝ Ռուստամ Բաքոյանը եւ Լիլիթ Սարգսյանը։
«Պատիվ ունեմ» խմբակցությունից Արցախում էր Տիգրան Աբրահամյանը, ով հաճախ է լինում Արցախում։ Նրա հետ եկել էր նաեւ ԱԺ նախկին փոխնախագահ, ՀՀԿ անդամ Էդուարդ Շարմազանովը, իսկ «Հայաստան» խմբակցությունից եկել էին «Վերածնվող Հայաստան» կուսակցության ներկայացուցիչները՝ կուսակցության նախագահ Վահե Հակոբյանը, Հռիփսիմե Ստամբուլյանը, Ելենա Կիրակոսյանը, մի փոքր ուշացումով Ստեփանակերտ հասան նաեւ պատգամավորներ Արամ Վարդեւանյանն ու ՀՅԴ-ական Գեղամ Մանուկյանը։
Վահե Հակոբյանն ու մյուսները ծաղիկներ խոնարհեցին Ստեփանակերտի հուշահամալիրում, որից հետո նրան լրագրողները մի քանի հարց ուղղեցին Արցախի անկախության, ներկայիս իրավիճակի, ինչպես նաեւ Արցախի ՊԲ նախկին հրամանատար Միքայել Արզումանյանին կալանավորելու եւ Հայաստանի իշխանությունների կողմից հիմա էլ նրան Շուշին հանձնելու մեջ մեղադրելու վերաբերյալ։ Առհասարակ՝ երեկ Արցախում բոլորի մտքում եւ շուրթերին այդ թեման էր, եւ լրագրողներն էլ բոլորին այդ հարցերն էին տալիս։ Վահե Հակոբյանը լրագրողներին ասաց․ «Արզումանյանի մեղադրանքը լուրջ չէ, իսկ Վանեցյանին ու Ծառուկյանին մեղադրելն անհեթեթություն է»։
Արցախի Պաշտպանության բանակի նախկին հրամանատար, գեներալ լեյտենանտ Լեւոն Մնացականյանից հետաքրքրվեցինք, թե նորմա՞լ է, որ Շուշին հանձնելու մեջ են մեղադրում Արցախի ՊԲ նախկին հրամանատար Միքայել Արզումանյանին: «Կասկածում եմ, նման բան չի կարող լինել»,- ասաց Մնացականյանը:
Նաեւ նշեց, որ ինքը որեւէ առնչություն չի ունեցել Շուշիի օպերացիայի հետ` խուսափելով ասել, թե ինչ պատասխանատվություն ունեն Արցախի գեներալները Շուշին հանձնելու եւ Արցախն այս վիճակին հասցնելու մեջ»:
