Նիկոլ Փաշինյանն Արցախում իշխանափոխությո՞ւն է ծրագրում. «Հրապարակ»

«Հրապարակ» թերթը գրում է.

«Վերջերս գրել էինք, որ վարչապետ Նիկոլ Փաշինյանն ու Արցախի նախագահ Արայիկ Հարությունյանն Արցախում ծրագրում են վերադասավորումներ իրականացնել: Այդ նպատակով են պայքարի դաշտ դուրս բերվել արցախյան շրջանակներին հայտնի «Վաղվա Արցախ» կուսակցության ղեկավար Տիգրան Պետրոսյանը եւ հանրային սեկտորի մի խումբ հայտնի ներկայացուցիչներ՝ ի դեմս Արթուր Օսիպյանի: Տեւական ժամանակ է՝ այս խումբն Արցախում հանրահավաքներ է իրականացնում՝ հրաժարականների պահանջով: 

Ցուցարարները պահանջում են Արցախի մի շարք բարձրաստիճան պաշտոնյաների հրաժարականները՝ Անվտանգության խորհրդի քարտուղար Վիտալի Բալասանյանի, պետական նախարար Արտակ Բեգլարյանի, ֆինանսների նախարար Վահան Բաղդասարյանի, արտաքին գործերի նախարար Դավիթ Բաբայանի, ոստիկանապետի: Պաշտոնյաների նմանօրինակ ցանկի ընտրությունն ինքնին մատնում է, որ պայքարն ուղղորդված է, եւ փորձ է արվում կառավարման համակարգից հեռացնել պաշտոնյաների, ովքեր, այսպես ասած, գլխացավանք կարող են դառնալ, քանի որ ինքնուրույն մտածողություն ունեն: Գաղտնիք չէ, որ մինչեւ տարեվերջ Արցախը նոր Սահմանադրություն է ունենալու, եւ հաջորդ տարի արտահերթ ընտրություններ են կայանալու, քաղաքական դաշտն էլ պետք է հստակեցվի․ հասկացվի՝ ով է իշխանություն, ով՝ ընդդիմություն, եւ ապագայում որքանով կպահպանեն իրենց կարգավիճակն այսօրվա քաղաքական ուժերը, իսկ մինչ այդ այսպիսի պայքարով կարելի է որոշակի ուժերի դիրքերն ամրապնդել, ցուցարար հիշյալ անձինք էլ Արցախի սորոսական հատվածի կարկառուն ներկայացուցիչներն են:

Սակայն Տիգրան Պետրոսյանի եւ Արթուր Օսիպյանի համատեղ պայքարը վերջերս ֆորմատային փոփոխության է ենթարկվել: Պետրոսյանն օգոստոսի 26-ից Ստեփանակերտի Վերածննդի հրապարակում նստացույց է իրականացնում, սակայն դրան չի միացել Արթուր Օսիպյանը:
Արցախի մեր աղբյուրներն ասում են, որ եթե Պետրոսյանին կառավարում են Երեւանից՝ Նիկոլ Փաշինյանն է նրա գործողությունների հետեւում կանգնած, ապա Արթուր Օսիպյանը ենթարկվում է Արայիկ Հարությունյանին: Առհասարակ, Արցախում խոսում են, որ Արայիկ Հարությունյանի եւ Նիկոլ Փաշինյանի միջեւ վերջին շրջանում լարվածություն է առաջացել, եւ դա ավելի շատ պայմանավորված է նրանով, որ Արցախն ու նրա նախագահը բացառապես ռուսական կողմնորոշում ունեն, իսկ Փաշինյանը դեպի Եվրոպա է ձգտում եւ անգամ թուրքերին ու ադրբեջանցիներին ավելի լավ է վերաբերվում, քան ռուսներին։ Իսկ Պետրոսյանին, ըստ լուրերի, ամբողջությամբ ուղղորդում են հայաստանյան շրջանակներից, նա մտերիմ է «Կապավոր» ՍՊԸ ընկերությունների տնօրենների խորհրդի նախագահ Արման Հակոբջանյանի հետ, ով էլ իր հերթին մտերիմ է ՔՊ-ական պատգամավոր Խաչատուր Սուքիասյանի հետ: Արման Հակոբջանյանն այն անձն է, ով 2021 թվականի համապետական ընտրությունների օրը ՔՊ կենտրոնական գրասենյակում իշխանականների հետ հետեւում էր ընտրությունների արդյունքներին:

Ճիշտ է՝ Նիկոլ Փաշինյանն Արցախում ձեւավորվող իր ընդդիմության միջոցով առայժմ խնայում է Արայիկ Հարությունյանին եւ, ասենք, նրա՝ իբրեւ կառավարող բուրգի ամենավերին օղակի հրաժարականը պահանջել չի համարձակվում, քանի որ ռուսական կողմը Հարությունյանի հետ սերտորեն աշխատում է եւ դեմ է նրա հեռանալուն։ Դա է պատճառը, որ այս պահին Երեւանից միայն որոշ պաշտոնյաների հրաժարականներն են պահանջում, սակայն կան տեղեկություններ, որ եթե փողոցում ծավալվող շարժումը որոշակի թափ հավաքի, Փաշինյանը, գալիք ընտրություններին ընդառաջ, կարող է խաղի մեջ մտցնել ՏԿԵ նախարար, իջեւանցի Հայկ Խանումյանին եւ նրա միջոցով իշխանափոխություն իրականացնել: Խանումյանը, հիշեցնենք, Փաշինյանի կողմից հովանավորվում է, եւ նաեւ այդ պատճառով է, որ չնայած անցնում է չարաշահումների քրեական գործով, ու Արցախի դատախազն ԱՀ նախագահին միջնորդել է դադարեցնել Խանումյանի լիազորությունները, սակայն վերջինս շարունակում է պաշտոնավարել եւ իրականացնել կարեւոր դերակատարում, ինչի ականատեսը եղանք Բերձորի ու Աղավնոյի բնակիչների տեղահանման գործընթացի իրականացման ժամանակ:

Գալով հրաժարականներին՝ չգիտես ինչու են ընտրվել հենց այս անձինք։ Ասենք՝ Արցախում կա ներքին գործերի նախարարություն, որի կազմի մեջ է մտնում ոստիկանությունը, բայց պայքարողները պահանջում են ոստիկանապետի, ոչ թե ՆԳ նախարարի հրաժարականը։ Ոստիկանապետն Արտեմ Հարությունյանն է՝ Ջալալ Հարությունյանի եղբայրը: Իսկ Ջալալ Հարությունյանին, անգամ երեկ մեղադրանք առաջադրելուց հետո, ակնհայտ է, որ այդքան էլ չեն թիրախավորում, այլ փորձում են իրենց բռի մեջ պահել։

Պետնախարար Արտակ Բեգլարյանն էլ Փաշինյանի թիրախում հայտնվելու պատճառ ունի: Մեզ պատմեցին, որ «Հայաստան» համահայկական հիմնադրամի խորհրդի վերջին նիստերից մեկի ժամանակ նա ընդդիմացել է Նիկոլ Փաշինյանին: Դավիթ Բաբայանը նույնպես ՀՀ իշխանությունների սեւ ցուցակում է։ Գաղտնիք չէ, որ Դավիթ Բաբայանն ընդգծված ռուսամետ է եւ հրապարակային հարցազրույցներում պարբերաբար խոսում է սորոսականների եւ Արեւմուտքի դեմ։ Բացի դա՝ բազմիցս հայտարարել է, որ Արցախի համար գոյություն ունեն կարմիր գծեր, այն է՝ Ադրբեջանի կազմում լինելու անհնարինությունը։ Եթե սրան գումարենք նաև այն, որ այս խնդիրներով պայմանավորված միջգերատեսչական կապ Հայաստանի եւ Արցախի արտաքին գերատեսչությունների միջեւ գոյություն չունի, իսկ Հայաստանի եւ Արցախի ԱԳ նախարարներն արդեն մեկ տարուց ավելի է՝ չեն հանդիպել միմյանց, ապա պարզ կդառնա, թե ինչու են Բաբայանի հրաժարականը նույնպես պահանջում: Ինչ վերաբերում է Վիտալի Բալասանյանին, ապա Արցախում նա այն մարդկանցից է, ում սիրում ու հարգում են, իսկ ինքը չի կարող կառավարվել հայաստանյան գործող  իշխանությունների կողմից, ուստի նա էլ պետք է հեռանա: Ահա, այսպիսի ծրագիր է իրականացնում ՀՀ իշխանությունն Արցախում, որի անվտանգության երաշխավորը չէ եւ որից հիմնավորապես հրաժարվել է, սակայն չի հրաժարվել այնտեղ իր համար ցանկալի իշխանություն ձեւավորելու մտքից»: