Խոշոր հրդեհ Ստեփանակերտում. հրդեհը մարելու ընթացքում հայտնաբերվել է «Ֆ-1» տիպի ձեռքի նռնակ (լուսանկարներ)

Հրշեջ-փրկարարները լիկվիդացրել են Ստեփանակերտ քաղաքում բռնկված հրդեհը: Կանչի վայրում աշխատել է 5 մարտական հաշվարկ:

Սեպտեմբերի 4-ին ժամը 15:26-ին ԱԻ պետական ծառայության 911 ճգնաժամային կառավարման կենտրոնում ահազանգ է ստացվել, որ Ստեփանակերտ քաղաքի Թումանյան 121 հասցեի հարակից տարածքում հրդեհ է բնռկվել և այրվում է չոր խոտատարածք:

Ժամը 15:27-ին փրկարար ուժերի վարչության հրշեջ-փրկարար մասից մեկ մարտական հաշվարկ՝ հրշեջ-մեքենայով մեկնել է դեպքի վայր: Քամու օգնությամբ հրդեհը արագ տարածվել է նշված տեղանքում, ինչը հաշվի առնելով ժամը 15:40-ին օգնության է մեկնել երկրորդ հրշեջ-մեքենան:

Հրդեհաշիջման աշխատանքներն առավել արդյունավետ կազմակերպելու նպատակով դեպքի վայր է ուղարկվել ևս 3 հրշեջ մարտական հաշվարկ և արագ արձագանքման հատուկ ստորաբաժանման հերթապահ օպերատիվ խումբը: Կրակի մարման աշխատանքներին մասնակցել են նաև թաղամասի բնակիչները:

Հրդեհը մարելու ընթացքում հայտնաբերվել է մեկ միավոր «Ֆ-1» տիպի ձեռքի նռնակ: Ժամը 16:30-ին ծառայության սակրավորական խումբը մեկնել է նշված վայր և հայտնաբերված զինամթերքը տեղափոխել անվտանգ տարածք՝ պահեստավորման նպատակով:

Հրդեհը մեկուսացվել է ժամը 16:20-ին, մարվել` ժամը 18:40-ին:

Հրդեհի հետևանքով այրվել է մոտ 1 հա չոր խոտատարածք, ծառեր և թփուտներ:
Դեպքի առթիվ ստուգումներ է իրականացնում ծառայության պետական հրդեհային և տեխնիկական անվտանգության տեսչությունը: