Պահանջում ենք հանդիպում Նիկոլ Փաշինյանի ու Արայիկ Հարությունյանի հետ. քաշաթաղցիները մտավախություն ունեն աջակցության ծրագրի հետ կապված

Օկուպացված Քաշաթաղի բնակիչ, «Վերադարձ դեպի Քաշաթաղ» ՀԿ տնօրեն Կարինե Մովսիսյանն ու մի շարք արցախցիներ պահանջում հանդիպում Նիկոլ Փաշինյանի և Արայիկ Հարությունյանի հետ։

«Մենք երկու հարց ունենք՝ ամենակարևոր հարցերը, որոնք մինչև օրս չեն լուծվել․ մեզ կարգավիճակ տրամադրելու և բնակարանով ապահովելու հետ կապված։ Կարգավիճակի հետ կապված որևէ մեկը ձայն չի հանում։ Կարծես այդ հարցն անգամ չենք էլ բարձրացրել, իսկ բնակարանների հետ կապված առաջարկվել է ծրագիր, որն ի սկզբանե մեզ համար եղել է անընդունելի։ Բայց հասկանալով պետության վատ վիճակի մեջ լինելը՝ մենք համաձայնեցինք ծրագրին։ Սակայն, հետագայում, երբ ավելի լավ ծանոթացանք ծրագրին, հասկացանք, թե որքան վտանգավոր է այդ ծրագիրը քաշաթաղցիների համար։ Նախ ծրագրում մտցրել են հիպոթեքային վարկ հասկացությունը, ծրագրի անունն էլ դրել են աջակցության ծրագիր, այն չի կարող բավարարել մեր պահանջները։ Հիպոթեքայինն իրենից ենթադրում է այն, որ եթե առնենք, ապա վաղը մյուս օր մնալու են բանկին զալոգ 10 տարի ժամանակահատվածով։ Ծրագրում հաշվի չի առնվել ընտանիքի կազմը, բազմազավակ լինելը»,- նշեց քաշաթաղցին։ 

Նրա խոսքով՝ մարդիկ անգամ այդ բնակարաները չեն կարող ժառանգություն թողնել մինչև չլրանա 10 տարին։ Բացի այդ, քաշաթաղցիները ռիսկային են համարում, որ վճարումը  կատարելու է կառավարությունը։ Իսկ կառավարության փոփոխության դեպքում, թե ինչ է անելու շահառուն, հայտնի չէ։