«Ալրաղացի Լյովիկի» և Սուրեն Ղազարյանի գործով դատավճիռը բողոքարկվել է. պաշտպանները պահանջում են արդարացում կամ գործի նոր քննություն

ԱԺ նախկին պատգամավոր, «Ալրաղացի Լյովիկ» մականունով հայտնի Լևոն Սարգսյանի և Սուրեն Ղազարյանի պաշտպանները պահանջում են բեկանել մեղադրական դատավճիռը և դադարեցնել հետապնդումը՝ մեղքն ապացուցված չլինելու հիմքով։

Ինչպես արդեն տեղեկացրել ենք՝ Երևանի ընդհանուր իրավասության դատարանը՝ դատավոր Տաթևիկ Գրիգորյանի նախագահությամբ, մեղավոր էր ճանաչել Լևոն Սարգսյանին և Ղազարյանին՝ դատապարտելով ազատազրկման՝ համապատասխանաբար 9 և 8 տարի ժամկետներով։

Պաշտպանության կողմը համաձայն չէ դատավճռի հետ և բողոքարկել է այն։ Վերաքննիչ բողոքով պաշտպանները պահանջում են բեկանել մեղադրական դատավճիռը։ Լևոն Սարգսյանի պաշտպանը պահանջում է արդարացնել նրան, կամ գործն ուղարկել առաջին ատյանի դատարան՝ նոր քննության, իսկ դրա անհնարինության դեպքում՝ Լևոն Սարգսյանի նկատմամբ նշանակել առավել մեղմ պատիժ։

Սուրեն Ղազարյանի պաշտպանը ևս պահանջում է կայացնել արդարացման դատական ակտ՝ մեղավորությունն ապացուցված չլինելու հիմքով դադարեցնելով Ղազարյանի և Սարգսյանի նկատմամբ քրեական հետապնդումը և կարճել վարույթը, կամ՝ գործն ուղարկել նոր քննության։

«Փաստինֆո»-ի հաղորդմամբ՝ Վերաքննիչ բողոքը կքննվի դատավոր Արսեն Նիկողոսյանի նախագահությամբ, դատարանի կազմում են դատավորներ Վազգեն Ռշտունին և Արշակ Վարդանյանը։

Հիշեցնենք, որ Լևոն Սարգսյանը մեղադրվում է մոտ 14 տարի առաջ Մաքսային կոմիտեի նախկին ղեկավար Արմեն Ավետիսյանի առանձնատան վրա կատարված ավազակային հարձակումը պատվիրելու մեջ։

Ավազակային հարձակումը տեղի է ունեցել 2008 թվականի հոկտեմբերին։ Այն ժամանակ հայտարարվեց, որ «Կոշիկի քաղաք» ՍՊԸ հիմնադիր Արա Կարապետյանը և Նոր Նորքի ոստիկանության բաժնի պետի նախկին տեղակալ Արմեն Նիկողոսյանը ստեղծել են հանցավոր համագործակցություն, որի անդամների կողմից կատարվել են մի շարք աղմկահարույց, առանձնապես ծանր հանցագործություններ կատարելու դեպքեր, այդ թվում` ՀՀ մաքսային պետական կոմիտեի նախկին պետ Արմեն Ավետիսյանի առանձնատան վրա ավազակային հարձակման դեպքը։ 2011թ. մայիսին կայացված դատավճռով հանցավոր համագործակցության 10 անդամները դատապարտվել էին երկարատև՝ մինչև 15 տարի ժամկետով ազատազրկման։

2018 թվականին ԱԱԾ-ն հայտարարեց, որ Արմեն Ավետիսյանի առանձնատան վրա ավազակային հարձակման իրական պատվիրատուն, նախնական տվյալների համաձայն, հանդիսացել է ՀՀ ԱԺ նախկին պատգամավոր, հանրությանը «Ալրաղացի Լյովիկ» մականունով հայտնի Լևոն Սարգսյանը, որը, լարված հարաբերությունների մեջ գտնվելով Արմեն Ավետիսյանի հետ, արդեն իսկ ձևավորված և ավազակային մի շարք հարձակումներ գործած հանցավոր խմբի անդամներին պատվիրել է վերոնշյալ հանցագործության կատարումը: Գործով մյուս մեղադրյալը՝ Սուրեն Ղազարյանը մեղադրվում է Լևոն Սարգսյանին օժանդակելու մեջ։

Լեւոն Սարգսյանը հայտնաբերվել եւ ձերբակալվել է ՌԴ Մոսկվայի մարզի Զելենոգրադ քաղաքում՝ 2019 թվականի նոյեմբերի 21-ին։

2020 թվականի մարտին հայտնի դարձավ, որ Ռուսաստանի Դաշնության գլխավոր դատախազությունը բավարարել է Լևոն Սարգսյանին քրեական հետապնդման ենթարկելու նպատակով Հայաստանի իրավապահ մարմիններին հանձնելու մասին ՀՀ գլխավոր դատախազության միջնորդությունը։

Նա Հայաստան է տեղափոխվել օգոստոսի 6-ին, գտնվում է «Երևան-Կենտրոն» ՔԿՀ-ում։ Երևանի ընդհանուր իրավասության դատարանը վերահաստատել է «Ալրաղացի Լյովիկի» նկատմամբ ընտրված խափանման միջոց կալանավորումը։