Օնլայն տաքսիներն ամեն պատվերից 100 դրամ պետտուրք կվճարեն. առնվազն 100 դրամով կթանկանա ամեն պատվերը․ փոխնախարար (տեսանյութ)

Տարածքային կառավարման և ենթակառուցվածքների նախարարությունը շրջանառության մեջ է դրել օրենսդրական փոփոխությունների նախագիծ, որի համաձայն, էլեկտրոնային հարթակով ուղևորափոխադրման ծառայությունների համար յուրաքանչյուր փոխադրման դեպքում կսահմանվի պետական տուրք։ Այս մասին լրագրողների հետ զրույցում ասաց Տարածքային կառավարման և ենթակառուցվածքների փոխնախարար Արմեն Սիմոնյանը։

Նա պարզաբանեց, որ օնլայն փոխադրումներ իրականացնողները գործունեության ծանուցման ենթակա կազմակերպություն պետք է դառնան և վճարեն պետական տուրք, որի գանձումը դրվելու է ոչ թե վարորդների, այլ կազմակերպությունների վրա։

Ըստ այդմ, նախարարությունն առաջարկում է, որպեսզի ամեն փոխադրումից պետական տուրք գանձվի` 100 դրամի չափով։

Սա, ենթադրաբար, իր հետ կբերի ուղեվարձի թանկացման։

«Եթե ընդունվի 100 դրամի մեխանիզմը, ապա դա առնվազն 100 դրամով կհանգեցնի ամեն պատվերի թանկացման»,- ասաց նա։

Հարկ է նկատել, որ նախարարությունը պատասխանատվություն չի կրում տաքսիների սակագների տատանումների համար։ Նախարարությունում հույսը դրել են օնլայն տաքսի-կազմակերպությունների բարեխղճության վրա՝ հաշվի առնելով, որ պիկ ժամերին ու անձրևներին տաքսու սակագները բարձրանում են։

«Սակագները պայմանավորված են պիկ ժամերով, եղանակային պայմաններով և եթե անբարեխիղճ վարքագծի հետ գործ ունենք, ապա այդ հարցով ՏՄՊՊՀ-ն է զբաղվում՝ պետք է հարց ուղղեք իրենց»,-ասաց Արմեն Սիմոնյանը։

Մանրամասներ՝ տեսանյութում