«Իրենց ասեք, որ էստեղ ենք մեռնելու»․ Սոցապնախարարությունը մերժել է հաշմանդամ օդաչուների՝ դատարանով հաստատված փոխհատուցումը (տեսանյութ)

«Հայկական ավիաուղիներ» ՓԲԸ նախկին օդաչուների հարցը դեռևս լուծված չէ:

«Պարոն վարչապետ, ե՞րբ պետք է լուծվի հաշմանդամ օդաչուների փոխհատուցման հարցը» մակագրությամբ պաստառն արդեն երկար տարիներ, հաշմանդամ օդաչուները բերում են իրենց հետ կառավարություն՝ չդադարելով հավատալուց ու հուսալուց, որ կփոխհատուցվեն։

18 տարի շարունակ այդ ակնկալիքով կառավարության դիմաց օդաչուներն արդարություն են պահանջում։ Նախկին օդաչուները նշում են, որ իրենք հաշմանդամություն են ձեռք բերել աշխատանքի ժամանակ ու պահանջում են ընդամենը իրենց հասանելիքը:

Այսօր արդեն գործը հասել է նրան, որ Արդարադատության նախարարությունը որոշում է կայացրել՝ հօգուտ հաշմանդամ օդաչուների։ NEWSPRESS.am-ի հետ զրույցում օդաչուները նկատեցին, որ հարցն ուղարկվել է Աշխատանքի և սոցիալական հարցերի նախարարություն՝ լուծում տալու համար։ Սակայն այստեղ դատարանի որոշումը մերժել են։

«Նախարարությունը նաև պրովոկացիոն նամակներ է ուղարկել առաջին ատյան, թե իբր հիմք չկա օդաչուների հայցը բավարարելու»,- ասում է մեր զրուցակիցը։ Կառավարության բակ եկած մյուս 4 ընկերները միանում են նրան ու վստահեցնում, որ մինչև վերջ գնալու են՝ իրենց հասանելիքն ստանալու համար։

«Իրենց ասեք, որ էստեղ ենք մեռնելու»,- ասաց նրանցից մեկը։ Մյուսը շարունակեց միտքը՝ պարզաբանելով․ «Կառավարությունից մարդիկ կան, ովքեր ուզում են ձգել այս գործը՝ մինչև բոլորս մեռնենք։ Ամենաջահելը ես եմ ու էս ընկերս՝ 84 տարեկան, մյուսներն ավելի մեծ են։ Բոլորս, ոնց որ ասում են, գերեզմանոցից օտպուսկ ենք եկել, իրցեն հույսն էլ դա է»,- ասաց մի օդաչու՝ հավելելով, որ 500-ից իրենց թիվն այսօր հասել է 30-ի։

Հիշեցնենք, որ աշխատանքի ընթացքում հաշմանդամություն ստացած օդաչուները դեռևս 16 տարի առաջ «Հայկական ավիաուղիներ» ընկերության կողմից ստանում էին առողջության վնասի փոխհատուցում: «Հայկական ավիաուղիները» 2006 թվականին լուծարվել է, իսկ դրանից հետո այդ գումարի վճարման պարտավորությունն ստանձնել էր Հայաստանի կառավարությունը: Սակայն մինչ օրս կառավարության կողմից վճարում չի կատարվել:

Արմինե Մկրտումյան