Հուսանք այդ հինգ գերիները հերթական առեւտրի առարկա չեն դարձել հայ ժողովրդի երկու ամենամեծ թշնամիների` Իլհամ Ալիևի և Նիկոլ Փաշինյանի ձեռքում. Էդգար Ղազարյան

Հայաստանի Հանրապետության արտակարգ դեսպանորդ և լիազոր նախարար,
տնտեսագիտության թեկնածու, դոցենտ Էդգար Ղազարյանը ֆեյսբուքյան իր էջում գրել է. 

«Երբ թշնամու ձեռքին գերի է հայտնվել ողջ հայ ժողովուրդը

2022 թվականի սեպտեմբերի 8-ին Ադրբեջանի կողմից 5 հայ գերիների հանձման մասին տեղեկատվությունը տարածել է ՀՀ ազգային անվտանգության ծառայությունը։ ՀՀ արտաքին գործերի նախարարությունն անգամ տեղյակ չի եղել դրա մասին նույնիսկ այն ժամանակ, երբ լուրը տարածվել է ադրբեջանական լրատվամիջոցների կողմից։ Սա նշանակում է, որ գերիների մի մասի հանձնումը տեղի է ունեցել ոչ թե 2020 թվականի նոյեմբերի 9-ի հայտարարության, այլ նոր պայմանավորվածությունների արդյունքում` դեռևս գաղտնի պահելով դրանց էությունը։

Նշվել է, որ գերիների հանձնումը տեղի է ունեցել առանց միջնորդների (նախկինում դա գրեթե մշտապես արվել է ռուսական խաղաղապահ ուժերի հրամանատարության մասնակցությամբ):

Գերիների հանձնման մասին հայտարարությամբ է հանդես եկել Հարավային Կովկասում և Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարը, ինչից պետք է ենթադրյալ, որ այդ քայլն իրականացվել է 2022 թվականի օգոստոսի 31-ին Բրյուսելում տեղի ունեցած եռակողմ հանդիպման պայմանավորվածությունների շրջանակներում։

Հուսանք Հայաստան վերադարձած հինգ գերիների դեմ քրեական գործեր չեն հարուցվի և նրանք Բաքվի բանտերից Երեւանի բանտերում չեն հայտնվի (այդ մասին, ի դեպ, դեռ ոչ մի հիշատակում չկա), հուսանք նաև, որ այդ հինգ երիտասարդները հերթական առեւտրի առարկա չեն դարձել հայ ժողովրդի երկու ամենամեծ թշնամիների` Իլհամ Ալիևի և Նիկոլ Փաշինյանի ձեռքում, ինչպես դա եղել է նախորդ դեպքերում»: