73 մարդ` 24 նստատեղ ունեցող ավտոբուսում, իրար գրկած ուղևորներ, «մուննաթով» վարորդներ. Երևանի տրանսպորտի թշվառությունն ու աջուձախ փիառվող քաղաքապետերը (լուսանկարներ)

Երևանի տրանսպորտը շարունակում է մնալ անմխիթար վիճակում: Թերևս ամռանն է, որ փոքր-ինչ «թեթևանում է» հանրային տրանսպորտի աշխատանքը՝ պայմանավորված դպրոցներում և բուհերում արձակուրդով, նաև՝ շատ աշխատողների արձակուրդում գտնվելով: 

Սակայն, սեպտեմբերը գալուն պես քաղաքային իշխանությունները կրկին դառնում են «ամենահիշվողը» քաղաքացիների շրջանում, իհարկե՝ վատ առումով: 

Իշխանության աջակցությամբ, ժողովրդի էյֆորիայի օգնությամբ քաղաքապետ դարձած Հայկ Մարությանը փորձեց սկսել լուծել հարցը, դեռևս 2018-ին հայտարարելով, թե՝ «Տրանսպորտային ցանցի ամբողջական փոփոխման համար առնվազն երկու տարի ժամանակ է պետք» և իհարկե, չէր մոռացել հիշատակել նախկիններին, և գեղեցիկ հայտարարություններով տեղավորվել այն ժամանակվա իշխանության ետնամուտքում: 

Անցել է ոչ թե 2, այլ 4 տարի, բայց այս իշխանության կողմից նշանակված` այն ժամանակ տեղակալ, հիմա էլ քաղաքապետ աշխատող Հրաչ Սարգսյանի օրոք որևէ դրական շարժ չկա: Առավոտյան և հատկապես աշխատանքային օրվա վերջում, մարդիկ կարող են ընդհուպ մինչև 1 ժամ մնալ կանգառում ու այդպես էլ չհաջողացնեն խցկվել այս կամ «Գազելը» կամ ավտոբուսը: 

NEWSPRESS.am-ի թղթակիցը խնդիրն ուղևորի տեսանկյունից հասկանալու համար սեպտեմբերի 8-ին, ժամը 17:45-ից եղել է Մաշտոցի պողոտայի՝ Սարոյանի արձանի հարակից կանգառում, այնուհետև փորձել հասնել Երևանի ծայրամասերից մեկը՝ Հարավ-արևմտյան թաղամաս:

33, 70, 77 համարի միկրոավտոբուսները, 26, 35 համարի ավտոբուսներն այնքան լիքն են եղել, պարզապես անհնար է եղել բարձրանալ դրանք:

Այդ ընթացքում մեր տեսախցիկը ֆիքսել է մի քանի այլ ավտոբուսների ծանրաբեռնվածությունը ևս: Ներկայացնենք դրանք նկարահանած ժամերով:

18:11

18:14

18:16

18:17

Սա, թերևս, որպես օրինակ այն խայտառակ իրավիճակի, որը տիրում է Երևանի տրանսպորտի ոլորտում: 

Ինչևէ: Առաջ շարժվելով տեղեկացնենք, որ շուրջ 35-40 րոպե անց 23 համարի ավտոբուսը (5459S համարանիշով) հաճել է ժամանել նշված կանգառ: Իբր կանգառում, այնուհետև ավտոբուսում մարդկանց քանակը քիչ էր, ուղևորը մի բան էլ «բոնուս նվեր» է ստանում ավտոբուսի անդաստիարակ վարորդ: Ստորև ներկայացված լուսանկարի պայմաններում ավտոբուսի վարորդն ուղիղ շանտաժ է անում, թե՝ առաջացեք, մինչև չառաջանաք, չեմ շարժվելու: 

Հետաքրքիր է, թե այդ «առաջ»-ը որտեղ է, որովհետև ինչպես նախորդ լուսանկարներում, այնպես էլ այստեղ երևում է, որ ոչ առջևում, ոչ էլ նախկին քաղաքապետի սիրած ետնամուտքում առանձնապես տեղ չկա: Իսկ ետնամուտքից բարձրանալ փորձողների վրա, տարրական էթիկայի ու դաստիարակության, համակեցության և վարվեցողության կանոնների մասին երբևէ չլսած վարորդը բարձրախոսով պատռում է կոկորդը, թե՝ հետևից մի նստեք (հավանաբար, նկատի ունի, որ ետնամուտքից բարձրացողները շատ ժամանակ չեն վճարում և այդ մետաղադրամներից շատերը հենց իր գրպանը չեն մտնում) կամ կտրուկ արգելակում է, մարդիկ իրար վրա են «թափվում»:

Ի վերջո, բանը հասել է նրան, որ մեր թղթակիցը ստիպված է եղել լռեցնել անվերջ գոռգռացող ու մի քանի կանգառում «մինչև չառաջանաք, չեմ շարժվելու» ասելով՝ շանտաժ անող վարորդին: 

Իր «մուննաթ» վարքագիծը նա, հավանաբար, կրկնօրինակել է քաղաքապետի աթոռը ձեռքը գցած Հրաչից, մեղադրելու չէ: Եթե Երևանի քաղաքապետը, նրա տեղակալները, ավագանու անդամները ոչ թե նկարվելու և «հասարակ քաղաքացի» երևալու համար տարին մեկ նստեն ավտոբուս, այլ ամեն օր ստիպված լինեն հասարակ երևանցու նման աշխատանքի գնալ, գուցե արագացնեն այս հարցի լուծումը, ոչ թե հուսադրող հայտարարություններով լապշա կախեն քաղաքացիների ականջներից: Այն քաղաքացիների, որոնց ձայները շատ շուտով ստիպված են լինելու մուրալ նույն իշխանությունները, այս անգամ, Տիգրան Ավինյանի համար...

Հ.Գ. Մինչ նյութը պատրաստում էինք հրապարակման, լուսանկար ստացանք մեր ընթերցողից: Այն արված է արդեն այսօր, 35 համարի ավտոբուսում: Մեր ընթերցողն ասաց, որ ինքը միաժամանակ 49 կանգնած մարդ է հաշվել ավտոբուսում (ընդհանուր` 73):

NEWSPRESS.am