Հարկավոր է ՔՊ-ին մենակ թողնել թշնամու օրակարգը սպասարկելու գործում. ՔՊ-ն Արցախը վաճառելու գործում գտնվում է միայնակ․ Սաղաթելյանը՝ ընդդիմության բոյկոտի մասին
Մինչ Ազգային ժողովում սկսվել է 8-րդ գումարման նստաշրջանը, ընդդիմությունը «Հայաստան և Արցախ. անվտանգային ահագնացող սպառնալիքներ» խորագրով քննարկում է անցկացնում։
Ելույթի ժամանակ ԱԺ «Հայաստան» խմբակցության պատգամավոր Իշխան Սաղաթելյանը նշեց, որ իրենք բոյկոտում են ԱԺ նիստը, քանի որ, Հայաստանի առաջնային և իրական օրակարգը Հայաստանի և Արցախի անվտանգության պաշտպանությունն է, մինչդեռ իշխանություններն այլ օրակարգով են հանդես գալիս։
«Մենք մեր հարյուր-հազարավոր քաղաքացիներից մանդատ ենք ստացել հենց այս օրակարգը պաշտպանելու համար: Հայաստանի իշխանությունները և նրա կցորդ ԱԺ մեծամասնությունը ոչ միայն չեն սպասարկում այդ օրակարգը, այլև աշխատում են դրա դեմ՝ նոր սպառնալիքներ ստեղծելով մեզ համար: Այսօր ԱԺ-ում կա ամեն ինչ, բացի Հայաստանի ժողովրդի, Հայաստանի և Արցախի շահերի պաշտպանությունից: Հադրութի և Շուշիի դեօկուպացիա խոստացած ու նաև դրա համար քվե ստացած քաղաքական մեծամասնությունը հրաժարվում է ԱԺ-ում դեմ արտահայտվել օկուպացված Շուշիում ստորագրված թուրք-ադրբեջանական հռչակագրին»,- ասաց Սաղաթելյանը:
Նա նշեց, որ այսօրվա ԱԺ «մեծամասնությունը» հրաժարվում է մասնակցելուց ընդդիմության կողմից հրավիրված արտահերթ նիստին, որտեղ պետք է ընդունվեր հայտարարություն՝ Հայաստանի կարմիր գծերի մասին։ Մասնավորապես՝ հայտարարվեր, որ Արցախը երբեք չի կարող լինել Ադրբեջանի կազմում:
«Ուրեմն հարկավոր է նրանց մենակ թողնել թշնամու օրակարգը սպասարկելու՝ իրենց ընտրության մեջ: Հայաստանի թշնամիները, միջազգային հանրությունը պետք է հստակ տեսնեն և հասկանան, որ հայ ժողովուրդը, Հայաստանի և Արցախի բոլոր քաղաքական առողջ ուժերը տեր են իրենց հայրենիքին, և ՔՊ-ն Արցախը զոհաբերելու կամ վաճառելու գործում գտնվում է միայնակ»,- ասաց Իշխան Սաղաթելյանը:
Նրա դիտարկմամբ, ստեղծված իրավիճակից լուծումը մնում է նոր կառավարության ձևավորումը, հանրային ու քաղաքական առողջ ուժերի մեկտեղումը:
