Հայաստանն այլևս Արցախի անվտանգության երաշխավորը չէ, և հարց է առաջանում՝ արդյոք Հայաստանն ինքն իր անվտանգության երաշխավո՞րն է․ Սեյրան Օհանյան

Շուշիի հռչակագիրը Թուրքիային թույլ է տվել հանդես գալ բացառապես ադրբեջանամետ դիրքորոշմամբ և Հայաստանի նկատմամբ դեռ ոտնձգության չի դիմել՝ զուտ ռուսական գործոնով պայմանավորված։ Այս մասին «Հայաստան և Արցախ. անվտանգային ահագնացող սպառնալիքներ» խորագրով քննարկման ժամանակ ասաց Ազգային ժողովի «Հայաստան» խմբակցության ղեկավար Սեյրան Օհանյանը։

Նրա դիտարկմամբ, ռուս-արևմտյան հակամարտությամբ պայմանավորված՝ Թուրքիան և Ադրբեջանը չեն կորցնում պահը՝ Հայաստանի նկատմամբ ագրեսիվ գործողություններ վերսկսելու համար: Պաշտպանության նախկին նախարար Օհանյանը նկատում է, որ արժանապատիվ դիմակայության պատրաստվելու փոխարեն՝ Հայաստանի իշխանությունները հայ ժողովրդին պարտադրում են «խաղաղություն ամեն գնով» սկզբունքը՝ տեղի տալով թուրք-ադրբեջանական ճնշումներին։

«44-օրյա պատերազմից հետո Ադրբեջանի ախորժակը բացվել է, իսկ Թուրքիան ակտիվորեն ներգրավվել է գործընթացների մեջ՝ ձգտելով ձևավորել նոր 3+3 հարթակը: Հայաստանն այլևս Արցախի անվտանգության երաշխավորը չէ, և հարց է առաջանում՝ արդյոք Հայաստանն ինքն իր անվտանգության երաշխավո՞րն է»,- ընդգծում է Օհանյանը:

Նա ընդգծում է, որ այսօր փլուզվել է նախկինում 4 շերտից՝ բանակ, հայ-ռուսական քաղաքական հարաբերություններ, ՀԱՊԿ, դիվանագիտություն, ԵԱՀԿ Մինսկի խմբի շրջանակներում բանակցային գործընթաց և տնտեսաքաղաքական համակարգը։

Անդրադառնալով միջսահմանային իրավիճակին՝ Օհանյանը նկատում է, որ Ադրբեջանն այժմ պահանջում է ապառազմականացնել Պաշտպանության բանակը, Արցախը ճանաչել Ադրբեջանի մաս, տրամադրել Զանգեզուրի միջանցք, որը պետք է լինի Լաչինի միջանցքի տրամաբանությամբ, ու նաև հանձնել որոշակի տարածքներ:

«Փաշինյանը գործնականում «այո» է ասել Ադրբեջանի բոլոր պահանջներին, բացառությամբ Զանգեզուրի միջանցքի, սակայն մենք տեսնում ենք, որ օղակը սեղմվել է, քանզի բաց ենք թողել թանկագին ժամանակը՝ բանակը վերականգնելու և դիվանագիտական ոլորտում քայլեր ձեռնարկելու համար»,- ասաց Սեյրան Օհանյանը:

Նա ընդգծեց նաև, որ հանուն սեփական իշխանության պահպանման, Փաշինյանը Հայաստանը դարձրել է աշխարհաքաղաքական մրցակցության թատերաբեմ և, խաղալով Բրյուսելի և Մոսկվայի միջև, Հայաստանը դրել է ծանր վիճակի մեջ:

Մանրամասները՝ տեսանյութում