Եթե ընդդիմությանը չհաջողվեց կասեցնել հիմնական՝ ներքին սպառնալիքը, կխոսենք պետականության կորստի մասին․ Արտակ Զաքարյան

Արձանագրենք, որ մեր պետության գոյության ընթացքում բազմաթիվ օրհասական և բացառիկ իրավիճակների հետ մեկտեղ, ստեղծվել է մի իրավիճակ, որտեղ ընդդիմությունը որպես քաղաքական ինստիտուտ այսօր ունի լիարժեք հնարավորություն հակակշռելու և կասեցնելու անվտանգային և ոչ անվտանգային բոլոր այն սպառնալիքները, որոնք այսօր ուղիղ իմաստով կանգնած են մեր պետության առաջ։ Այս մասին այսօր «Հայաստանի իրական օրակարգը» քննարկման ժամանակ ասաց Պաշտպանության նախկին փոխնախարար Արտակ Զաքարյանը։ 

Նրա խոսքով՝ այդ գործընթացում մեզ չի հաջողվում մի շատ կարևոր բան՝ հասարակության մեծ չափի ներգրավումը, ուղիղ աջակցությունն ընդդիմադիր երկու խմբակցություններին։ Սա կարևոր և որոշիչ առաքելություն է լինելու մեր պետության գոյության համար։

«Եթե, Աստված մի արասցե, ընդդիմիությանը չհաջողվեց վերացնել երեք հիմնական սպառնալիքներից ամենագլխավորն ու առաջնայինը, այսինքն՝ ներքին սպառնալիքը, ապա մենք իրավացի ենք, եթե խոսում ենք պետականության կորստի և վտանգի մասին։ Հետևաբար, անվտանգային միակ խնդիրը՝ ներքին խնդիրը պետք է օրակարգային պահենք, քանի դեռ ազդեցությունը պետության ներքին կյանքի վրա շարունակում է գոյություն ունենալ»,- նշեց Զաքարյանը և հավելեց, որ ունենք նաև երկրորդ անվտանգային խնդիր, այն է՝ տարածաշրջանային սպառնալիքը։

Նախկին փոխնախարարի խոսքով՝ շատ կարևոր են հասկանալ բոլոր այն գործընթացները, որոնք կարող են նոր սպառնալիքներ և նոր իրավիճակներ ստեղծել մեր պետության համար։ Այս իմաստով պիտի նկատի ունենալ ոչ միայն ֆիզիկական, ռազմական անվտանգությունը, այլ նաև պարենային, կոմունիկացիոն, կրթական, հոգևոր և արժեքային։