Չպետք է թույլ տալ, որ «խաղաղության պայմանագիր» կնքվի․ Արամ Գ․ Սարգսյանը՝ պայմանագրի ծանր հետևանքների մասին

Բոլորս արդեն համոզվեցինք, որ Բրյուսելում պարոնը համաձայնվել է բոլոր կետերի հետ, որտեղ ընդհանրապես չկա Արցախի վերաբերյալ որևէ խոսք։ Այս մասին այսօր «Հայաստանի իրական օրակարգը» քննարկման ժամանակ ասաց «Հայաստանի դեմոկրատական կուսակցության» հիմնադիր Արամ Գ․ Սարգսյանը։ 

Նրա խոսքով՝ այդ պարագայում պարզ է դառնում նաև եվրոպական այդ կառույցի դիրքորոշումը, որն, իհարկե, գազի համը տեսել է և ուզում է ավելին ստանալ։ Եվ այդ տեսակետին կարծես թե Ֆրանսիան և Միացյալ Նահանգները համաձայն չեն։

«Երկրորդն այդ հարցում Ռուսաստանի դիրքորոշումն է, որը նա ներկայացրել է այսօրվա իշխանություններին։ Այդտեղ նշված է նաև Արցախի հիմնահարցի կարգավորման համապատասխան ձևն ու կարգավիճակի հարցը։ Այսօրվա իշխանությունները տեղյակ են այդ առաջարկների մասին, բայց բացարձակ որևէ ուշադրություն չեն դարձրել և ընդամենը խոսքով են հայտարարում, որ, այո՛, իրենք կողմ են քննարկմանը»,- նշեց Արամ Գ. Սարգսյանը։

Սարգսյանն անդրադարձավ նաև «խաղաղության պայմանագրին»։ Նրա խոսքով՝ միակ օրակարգն այն է, որպեսզի թույլ չտրվի, որ այդ պայմանագիրը կնքվի, որովհետև արդեն պարոնը հայտարարել է, որ Տեղ գյուղից հետո այլևս Ադրբեջանն է, որ Արցախն Ադրբեջան է և վերջ, ինչպես նաև հայտարարել է այն դիրքորոշման մասին, որն ինքն ի սկզբանե ունեցել է։  

«Որևէ հույս կապել, որ նա կարող է իր դիրքորոշումը փոխել, դա բացարձակ անհեթեթություն է։ Ուստի մեր օրակարգը հետևյալն է, որ պայմանագիրը չպետք է կնքվի։ Հետևանքները մենք գիտենք։ Նա հանձնարարել է, որ նոյեմբերի 9-ին այդ պայմանագրի տեքստը պատրաստ լինի։ Եվ այդ պարագայում, եթե կնքվում է այդ պայմանագիրը, ապա այսպես կոչված խաղաղություն է հաստատվում, մենք, ավելի ճիշտ՝ ինքը, ճանաչում է Ադրբեջանի տարածքային ամբողջականությունը, ապա Ադրբեջանը հաջորդ օրն իսկ առաջարկում է ՌԴ-ին իր խաղաղապահ ուժերը դուրս բերել Արցախից»,- նշեց Սարգսյանը և հավելեց, որ այս ամենը տեղի կունենա դեկտեմբերին։