Ես կասկած չունեմ, որ Ադրբեջանը նոր պատերազմ է սանձազերծելու, ընդ որում՝ Հայաստանի թրքադավ իշխանությունների հետ համաձայնեցված․ Զոհրաբյան

Հասկանալի է, որ Նիկոլ Փաշինյանը խճճվել է Մոսկվայի և Բրյուսելի սարդոստայններում։ Խճճվել է նաև իր իսկ տված գրավոր և բանավոր խոստումների սարդոստայնում։ Եվ հասկանալի է, որ պատերազմը նա երկրորդ անգամ է բերել, իսկ այս անգամ՝ Հայաստան։ Այս մասին «Հայելի» ակումբում ասաց ԱԺ նախկին պատգամավոր Նաիրա Զոհրաբյանը։

Զոհրաբյանի խոսքով՝ մենք իսկապես կանգնած ենք շատ վտանգավոր սահմանագծին, և որևէ երաշխիք չկա, որ հիմա մենք խոսում ենք, ու Ադրբեջանը չի սկսի ռազմական գործողություններ։

«Մենք պետք է բոլորս իսկապես համախմբվենք, բոլոր տարաձայնությունները մի կողմ դնենք։ Մի կողմ դնենք բոլոր իդիոտիզմները։ Պիտի դադարեցնենք անպտուղ ջուր ծեծել, անպտուղ օրակարգեր սպասարկել։ Պիտի հնչեցվի Հայրենական պատերազմի կոչ։ Այս պատերազմը, հնարավոր պատերազմը հնարավոր է կանխել։ Հնարավոր է կանխել այդ խայտառակ կապիտուլյացիոն պայմանագիրը, որը լինելու է Հայաստանի վերջնական կապիտուլյացիան։ Եվ դա հնարավոր է մեկ քայլով՝ Նիկոլ Փաշինյանի հեռացմամբ։ Այսինքն՝ մեր բոլոր գործողությունները, քայլերը, նպատակները պետք է լինեն Փաշինյանի հեռացումը։ Նա այլևս մարիոնետ է, պատանդ է իր ստերի, խոստումների, լիֆտային խոստումների, վերելակային պայմանավորվածությունների՝ Ալիևի հետ»,- նշեց Զոհրաբյանը։

Վերջինիս խոսքով՝ այս ամենի արդյունքում լինելու է հերթական կապիտուլյացիան՝ Հայաստանի կապիտուլյացիան։ Մի լավ խոսք կա՝  պատերազմի համար պետք է մեկ կողմ, խաղաղության համար՝ երկու։ Այս բալանսը, այս խաղի կանոնը խախտված է։

«Այդ չակերտավոր խաղաղությունն էլ այսօր, ըստ էության, պարտադրվում է մեկ կողմով»,- նշեց Զոհրաբյանը և հավելեց, որ ինքը կասկած չունի, որ Ադրբեջանը նոր պատերազմ է սանձազերծելու, ընդ որում՝ Հայասատանի թրքադավ իշխանությունների հետ համաձայնեցված։