2020 թվականի պատերազմում ծանր կորուստներ ենք ունեցել․ խաղաղությունն այն միջավայրն է, որտեղ ՀՀ-ն կարող է զարգանալ, ընդ որում՝ մեծ տեմպերով․ Փաշինյան

Ունենք գործող փաստաթուղթ, որի ներքո դրված է ադրբեջանական կողմի ստորագրությունը, որ կա ԼՂ սուբյեկտ, որն ունի շփման գիծ և որտեղ ռուս խաղաղապահներ կան։ Այս մասին Ազգային ժողովում իր ելույթի ժամանակ այս մասին հայտարարեց  Նիկոլ Փաշինյանը։ Նա նշեց, որ ըստ այդ փաստաթղթի, գոյություն ունի նաև Լաչինի միջանցք, որը մարդկանց տեղափոխման և բեռների փոխադրման համար է։

«Վերջին շրջանում Ադրբեջանը փորձում է շրջանառությունից հանել, արխիվացնել նոյեմբերի 9-ի հայտարարությունը»,- ասաց Փաշինյանը։

Նրա խոսքով` 2020 թվականի 44-օրյա պատերազմից հետո Ադրբեջանը մի քանի անգամ հայտարարել է, որ եթե տեսնի, որ ՀՀ զինված ուժերը և բանակը որոշակի պոտենցիալ է հավաքում, որն իր ձևակերպմամբ կարող է վտանգ ներկայացնել Ադրբեջանին, իրենք նախահարձակ գործողություններ են իրականացնելու։

Փաշինյանը վստահեցրեց, թե բանակի բարեփոխումները դրան չէին միտված, չնայած ՀՀ–ն պետք է բոլոր հնարավոր միջոցներով հնարավորինս արագ և արդյունավետ բարեփոխի բանակը, մեր զինված ուժերը։

Նրա խոսքով` 2020 թվականի պատերազմի արդյունքում մենք ծանր կորուստներ ենք ունեցել, բայց ՀՀ-ն չի կոտրվել։

«Մենք, որդեգրելով խաղաղության օրակարգը, հասկանում ենք, որ դա մի սուբյեկտից կախված չէ։ Ընդհակառակը, այս գործողություններով Ադրբեջանն ուզում է և փաստացի տորպեդահարում է խաղաղության օրակարգը, որովհետև խաղաղությունն այն միջավայրն է, որտեղ ՀՀ-ն կարող է զարգանալ, ընդ որում՝ մեծ տեմպերով»,- ասաց Փաշինյանը։