Քիչ էր մնում՝ բարիշեին. «Հրապարակ»

«Հրապարակ» թերթը գրում է․

Ընդդիմությունը երեկ իր այլընտրանքային նիստը թողել ու գնացել էր ԱԺ։ Նախորդ օրը նրանք նոր հարթակ էին ստեղծել եւ անգամ առաջին նիստն արել` «Անի գրանդ» հյուրանոցում, «Հայաստանի իրական օրակարգը» թեմայով, որի շրջանակներում նախօրեին խոսել էին Հայաստանի անվտանգության խնդիրներից, իսկ երեկ պետք է սոցիալ-տնտեսական հարցեր քննարկեին: Սակայն գիշերվա իրադարձությունների պատճառով հրաժարվել էին այդ քննարկումից եւ շտապել ԱԺ: Ավելին, ընդդիմադիր պատգամավորներից մի քանիսն անգամ առավոտ շուտ դահլիճ էին մտել ու ՔՊ-ականների հետ «բարեկամություն-բարեկամություն» էին խաղում։

«Պատիվ ունեմ»-ից Հայկ Մամիջանյանը, «Հայաստան» խմբակցությունից էլ Սեյրան Օհանյանն ու Արծվիկ Մինասյանը խելոք նստել՝ օրակարգ էին քննարկում, թե ինչպես գան եւ հայտարարության համատեղ նախագծի վրա աշխատեն։ Ալեն Սիմոնյանն ու Ռուբեն Ռուբինյանն էլ, տեսնելով, որ ընդդիմությունը, «երկրի շահով տոգորված», ինքնակամ եկել է ԱԺ ու հասել դահլիճ, որոշեցին, որ իսկը պահն է՝ նրանց հետ բարեկամանալու, համոզելու, որ երկիրը վատ վիճակում է պետք է հիմա բոլորս միասնական լինենք, ուստի լավ կլինի, որ ամբողջ ընդդիմությունը վերադառնա դահլիճ, մասնակցի նիստին, ու միասին մի հայրենանվեր հայտարարության նախագիծ մշակեն, որ ցույց տան աշխարհին, թե ընդդիմությունն ու իշխանությունը որքան միասնական են այս պահին միմյանց հետ։

Կարծես թե եկան համաձայնության, որ գնան ընդմիջման ու այդ ընթացքում աշխատեն համատեղ նախագծի վրա։ Բայց ընդմիջումից հետո Նիկոլ Փաշինյանը եկավ դահլիճ՝ ներկայացնելու ստեղծված իրավիճակն ու պատասխանելու պատգամավորների հարցերին, իսկ ընդդիմությունը չկար։ Նրանք որոշել էին իշխանության հետ «համագործակցել» միայն համատեղ դատապարտող հայտարարության տեքստի շուրջ, այն էլ՝ եթե իրենց առաջարկությունները եւս ընդունի իշխանությունը։ Օրվա վերջում արդեն, երբ նորից կոչնակը հնչեց, ու պատգամավորները մտան դահլիճ, ՔՊ-ն ներկայացրեց իր նախագիծը, Արծվիկ Մինասյանը՝ ընդդիմության հայտարարության տարբերակը, պարզ դարձավ, որ ընդհանուր հայտարարի չեն եկել։ Թեեւ ՔՊ-ի կազմած հայտարարության բովանդակության հետ ընդդիմությունն անհամաձայնություն չուներ, բայց նրանք կարծում են, որ դա ամբողջական չէ, պետք էր մի երկու խիստ կետ էլ ավելացնել, որն իրենք առաջարկել էին, իսկ ՔՊ-ն՝ մերժել։ Դրա համար էլ դեմ չքվեարկեցին ՔՊ-ի բերած նախագծին։ Արդյունքում` ընդդիմություն-իշխանություն հարաբերական սիրախաղը շատ կարճ տեւեց։
ՔՊ-ականների նյարդերը տեղի տվեցին, ու սկսեցին դասեր տալ ընդդիմությանը, թե դուք պետական շահից հեռու եք, միասնական չեք եւ այլն։

ԱԺ նախագահ Ալեն Սիմոնյանն էլ՝ որպես ՀՀ քաղաքացի, նեղացած տոնով խնդրեց ընդդիմությանը, որ այլեւս չգան դահլիճ։ «Ուզում եմ հասկանամ․ վարչապետը եկել ասում ա՝ էկեք հարց տվեք, եկել ա, ներկայացնում ա՝ 49 զոհ ունենք, էսքան վիրավոր ունենք, մենք՝ մեր օրակարգն ունենք։ Մի եկեք, էլի, դահլիճ, անկեղծ խնդրում եմ ձեզ, որպես Ազգային ժողովի նախագահ չեմ խնդրում, որպես ՀՀ քաղաքացի եմ խնդրում։ Որ գալիս եք, ո՞ւմ ա պետք։ Լուրջ եմ ասում՝ հազար ափսոս, որ նույնիսկ էս իրավիճակում դուք չեք կարողանում ՀՀ շահը սպասարկել»,- ասաց ԱԺ նախագահը։ Այսքանով երեկվա թատրոնն ավարտվեց։ Սակայն մեկ անգամ էլ հասկացվեց, որ իշխանության գիտակցությանը դեռ չի հասել, թե ով է իր հակառակորդը` ընդդիմությանն ավելի շատ են հակառակորդ համարում, քան այսօր մեր սահմանները գնդակոծող թշնամուն:

Ամբողջական հոդվածը կարող եք կարդալ այս հասցեով՝ : https://hraparak.am/post/04b52f9d5d490d4f48aa13422f0f76fd