Եկել ենք՝ ՌԴ-ին փոխանցենք մեր աջակցության հռչակագիրը. ակցիա՝ ՌԴ դեսպանատան դիմաց (տեսանյութ)

Հայաստանի Հանրապետությունում Ռուսաստանի Դաշնության դեսպանատան մոտ հերթական ակցիան է մեկնարկել։ Այս անգամ մի խումբ քաղաքացիներ՝ ՍԻՄ նախագահ Հայկ Բաբուխանյանի գլխավորությամբ ակցիա են անում՝ ի աջակցություն հայ-ռուսական դաշնակցային, եղբայրական հարաբերությունների։

«Մենք եկել ենք, որպեսզի ՌԴ-ին փոխանցենք մեր աջակցության հռչակագիրը, աջակցություն՝ հայ-ռուսական հարաբերություններին։ Մենք եկել ենք, քանի որ վերջին օրերի ընթացքում տեղի են ունեցել դեպքեր, ելույթներ, որոնք փորձում են կասկածի տակ դնել հայ-ռուսական հարաբերությունները, հարյուրավոր տարիների բարեկամական հարաբերությունները»,- այս մասին քիչ առաջ իր ելույթում նշեց Հայկ Բաբուխանյանը։

«Մենք այստեղ ենք, որովհետև սիրում ենք Հայաստանը, պայքարում ենք Արցախի համար։ Մենք այստեղ ենք, որովհետև մենք գնահատում ենք Ռուսաստանի աջակցությունը։ Այդ աջակցությունը ոչ թե միայն բառերով է, այլ զինվորներով է, խաղապահներով է, սահմանապահներով է»,- հավելեց նա։

«Որպեսզի հասկանանք՝ ինչ է կատարվում, ինչ են մեզ համար նախապատրաստում, պիտի նայենք, թե ինչ եղավ 100 տարի առաջ։ 1918 թվականին Մեծ Բրիտանիան Հարավային Կովկասում ստեղծեց անդրկովկասյան սեյմ՝ Հայաստան-Վրաստան-Ադրբեջան։ Այդ սեյմը բաղկացած էր այս երեք պետությունների քաղաքական ուժերից։ Այդ սեյմը հստակ ուղղված էր Ռուսաստանի դեմ։ Այս սեյմով պատերազմի մեջ էր մտել Թուրքիայի դեմ, այսինքն՝ Մեծ Բրիտանիան այս սեյմը հանել էր Թուրքիայի դեմ ու նրանք պատերազմում էին։ Կարսի ամրոցը 1918 թվականին անառիկ ամրոց էր, դա ուղղակի հնարավոր չէր վերցնել, դա կարող էր միայն հանձնվել։ Ռուսաստանը Կարսի ամրոցում թողել էր մի քանի հարյուր թնդանոթ, մի քանի տասնյակ հազար հրացան։ Անդրկովկասյան սեյմի ղեկավարի, որը վրացի էր այն ժամանակ, հրամանով հանձնվել է Կարսի ամրոցը։ Այն ժամանակ ռուսները զենք էին թողել, նրանք այստեղ չէին, բայց զենքը թողել էին, բա ինչու չպահեցինք Կարսի ամրոցը»,- իր ելույթում ասաց «Հայաստանի հականացիստական շարժման» համակարգող Հայկ Այվազյանը