13 օր Վերին Շորժայի ձորակում ունենք վիրավորներ ու դիեր․ գոնե վիրավորներին ժամանակին հանեիք, երեխաները հիմա փրկված կլինեին․ անհետ կորածի ծնող (տեսանյութ)
Սեպտեմբերի 13-ին, ադրբեջանական ԶՈւ ստորաբաժանումների հարձակումից հետո, անհետ կորած զինծառայողների հարազատներն անորոշության մեջ են։
Վերջիններս տարբեր կառույցների դիմելով՝ այժմ էլ Պաշտպանության նախարարության դիմաց են բողոքի ակցիա անցկացնում։
Ավելի կոնկրետ՝ նրանք եկել են ճշտելու, թե ինչ է անում նախարարությունն իրենց զինծառայողներին հայտնաբերելու ուղղությամբ։
Ժամկետային զինծառայող Սերյոժա Ղազարյանի հայրը՝ Սերժիկ Ղազարյանը, լրագրողների հետ զրույցում նշեց, որ արդեն 13 օր է՝ լուր չունի իր որդուց։
Նա դիմեց Նիկոլ Փաշինյանին՝ հորդորելով զբաղվել խնդրով։
«Պարոն Փաշինյան, ժողովուրդն արդեն հուսալքության մեջ է: Դիմում եմ ձեզ՝ որպես զինվորի ծնող: Ակնկալում եմ զինվորի ծնողի աչքերով նայել ժողովրդին ու ձեր խոսքն ասել ժողովրդին, որը հիմա ներսում է գտնվում»,- ասաց Սերժիկ Ղազարյանը։
Նա նաև ՊՆ-ին դիմեց։ Մասնավորապես, ծնողներն ուղում են հասկանալ՝ ի՞նչ միջոցներ է ձեռնարկում նախարար Սուրեն Պապիկյանը՝ իրենց երեխաներին հայտնաբերելու ուղղությամբ։
«13 օր այդ ձորակի մեջ ունենք վիրավորներ, ունենք դիեր: Ոչինչ չեք ձեռնարկում, որ գոնե վիրավորներին ժամանակին հանեիք, երեխաները հիմա փրկված կլինեին: Խոսքը Վերին Շորժայի մասին է, որտեղ ունեցել ենք զոհեր ու վիրավորներ: 13 օրում գելերը, աղվեսները հոշատած կլինեն դիակները, ո՞նց ենք տանելու տանք ծնողներին: Մենք առողջ երեխա ենք տվել, որ հայրենիքը պաշտպանի, այսօր անելանելի վիճակում ենք: Բայց ես կկանգնեմ իմ զինվորի, իմ սպայի կողքին»,- ասաց նա:
Զինծառայողի հոր խոսքով՝ վերջին անգամ որդու հետ կապ ունեցել են սեպտեմբերի 13-ի վաղ առավոտյան:
Մանրամասները՝ տեսանյութում
