Գրեթե բոլոր համայնքներում իշխանության ներկայացուցիչների կողմից տեղի են ունեցել սպառնալիքներ, աշխատանքից ազատում, տարատեսակ արտոնությունների և աջակցությունների տրամադրում. «Ապրելու երկիր»

«Ապրելու երկիր» կուսակցությունը հայտարարություն է տարածել, որում, մասնավորապես, ասված է.

«Սեպտեմբերի 25-ին Ալավերդի, Գյուլագարակ, Լոռի Բերդ, Չարենցավան, Թալին, Սիսիան համայնքներում տեղի ունեցած ավագանու ընտրություններում «Ապրելու երկիր» կուսակցությունը բոլոր համայնքներում ներկայացված է լինելու ավագանու կազմերում՝ նախնական տվյալներով արձանագրելով հետևյալ արդյունքները՝
Գյուլագարակ-49%
Ալավերդի-48%
Լոռի Բերդ-28%
Սիսիան-20%
Չարենցավան-7%
Թալին-7%
Ալավերդի համայնքում «Ապրելու երկիր» կուսակցությունը տարել է հաղթանակ՝ ակնկալելով ստանձնել համայնքի կառավարումը։

Շնորհակալություն ենք հայտնում մեր օգտին քվեարկած քաղաքացիներին։ Վստահեցնում ենք, որ մեր աշխատանքով լինելու ենք պատասխանատու այդ համայնքներում ծառայել համայնքի բնակիչների շահերին և համայնքների զարգացմանը։

Միևնույն ժամանակ, հարկ է արձանագրել, որ գրեթե բոլոր համայնքներում իշխանության տարբեր ներկայացուցիչների կողմից տեղի են ունեցել վարչական ռեսուրսի չարաշահման բազմաթիվ դեպքեր՝ սպառնալիքներ, աշխատանքից ազատում, տարատեսակ արտոնությունների և աջակցությունների տրամադրում և այլն, իսկ իշխանության ցուցակներում նախկին իշխանության կարկառուն ներկայացուցիչների ներգրավումը և «տեղական հեղինակությունների» մասնակցությունը քարոզչությանը և բուն ընտրության օրվա գործընթացին հիշեցնում էին հին ու բարի ժամանակները՝ հերթական ծառայությունը հերթական իշխանությանը։

Սիսիան համայնքում համայնքի ղեկավարը ընտրվելու է ավագանու անդամների կողմից, որի վերաբերյալ կուսակցությունը իր դիրքորոշումը կհայտնի լրացուցիչ՝ նպատակ ունենալով ստանձնել համայնքի կառավարումը։

Ամփոփելով ՏԻՄ ընտրությունները՝ «Ապրելու երկիր» կուսակցությունն իր գործունեության կարճ ժամանակահատվածի համար դրական է գնահատում արձանագրված արդյունքները, ստանալով ավելի քան 13,000 ձայն (ընտրությունների մասնակիցների 23%)՝ ներկայացված լինելով 6 համայնքերում 32 ավագանու անդամներով։ Այս արդյունքը ավելի քան երկու անգամ գերազանցում է կուսակցության նախորդ տարվա արձանագրած ցուցանիշները։

Ստացած ձայների և ավագանու անդամների թվով՝ «Ապրելու երկիր» կուսակցությունը, ինչպես նախորդ տարի, այս անգամ ևս, արձանագրել է լավագույն արդյունքը իշխող կուսակցությունից հետո։

«Ապրելու երկիր» կուսակցության ունեցած նման հաջողությունը քաղաքական պայքարում օգտագործվող սկզբունքային նոր մոտեցման և գործելաոճի շնորհիվ է։

Համայնքներին արված մեր առաջարկները եղել են փորձագետների կողմից մշակված և ընտրողների արձագանքների և ցանկությունների վրա հիմնված։

Իսկ մեր ամենամեծ առավելությունը՝ համայնքներում նոր մարդկանց ներգրավումն է՝ ի հակադրություն արդեն իրենց հայտնիությունը կորցնող նախկին և իշխող քաղաքական խմբերի։

Մենք շարունակելու ենք մեր ակտիվ գործունեությունը համայնքների զարգացման գործում, որը համարում ենք կարևորագույն քայլերից՝ հզոր և բարեկեցիկ պետություն կառուցելու ճանապարհին։

Միևնույն ժամանակ, հաշվի առնելով բազմաթիվ համայնքներում իշխող կուսակցության պարտությունը ինչպես այս, այնպես էլ նախորդ տարի, ակնհայտ է, որ հասարակությունը ունի որակական փոփոխությունների անհրաժեշտություն և վստահում է «Ապրելու երկիր» կուսակցությանը՝ ստանձնելու այդ պատասխանատվությունը՝ իրականացնելու իշխանության ամբողջական փոփոխություն։

#ԱպրելուԵրկիր
#ԱպրելուԱլավերդի
#ԱպրելուՉարենցավան
#ԱպրելուԹալին
#ԱպրելուՍիսիան
#ԱպրելուԳյուլագարակ
#ԱպրելուԼոռիԲերդ»: