ՔՊ-ականներն հուզված են ոչ այնքան Անդրեասյանի՝ ԲԴԽ գնալով, որքան Գրիգոր Մինասյանի նշանակման հեռանկարից․ «Հրապարակ»

«Հրապարակ» թերթը գրում է․

Նախօրեին արդարադատության նախարար, ՔՊ-ի կողմից ԲԴԽ անդամի պաշտոնում ներկայացված Կարեն Անդրեասյանն ԱԺ-ում հանդիպել է իշխող խմբակցության հետ: Մեզ ասացին, որ խմբակցության մոտ կեսն է ներկա եղել, գրեթե հարց չեն տվել թեկնածուին, հանդիպումը 10-15 րոպե է տեւել։ Անդրեասյանն ասել է, թե ինչու է ընդունել նախարարի պաշտոնը թողնելու եւ դատական համակարգ տեղափոխվելու առաջարկը: Ասել է, որ այնտեղ շատ խնդիրներ է տեսնում եւ կարծում է, որ «ոլորտն էապես բարեփոխելու կարիք ունի»։ Նա ԲԴԽ շարքային անդամ կընտրվի, ապա՝ նախագահ, որպեսզի ավարտին հասցնի Գագիկ Ջհանգիրյանի սկսածը` դատական համակարգի ստրկացումը:

Մեր աղբյուրն ասաց, որ ՔՊ-ականներն առավել հուզված են եղել ոչ այնքան Անդրեասյանի՝ ԲԴԽ գնալով, որքան նրանով, որ Փաշինյանը մտադիր է նախարար նշանակել ներկայիս փոխնախարար Գրիգոր Մինասյանին` Միքայել Մինասյանի եղբորը, ով իր ընտանիքի հետ տարիներ առաջ կապը խզել է եւ անգամ ցանկացել է ազգանունը փոխել։ ՔՊ-ում հիշում են, որ Գիգիշը, ինչպես նրան նեղ շրջապատում կոչում են, ժամանակին Փաշինյանի հասցեին շատ վատ է արտահայտվել, եւ դեմ են եղել նաեւ նրա` փոխնախարար նշանակվելուն, սակայն եզրակացրել են, որ վարչապետը Կարենի խաթրից դուրս չի եկել` նրա մտերիմ ընկերոջը փոխնախարար նշանակելով։ Լուրեր կան, որ նախարարի պաշտոնին հավակնում է նաեւ Վլադիմիր Վարդանյանը, սակայն նա Փաշինյանին պետք է խորհրդարանում, քանի որ օրենսդրական բլոկը կմնա անգլուխ։

Ամբողջական հոդվածը՝ թերթի այսօրվա համարում։