Չեմ սպասում, լավ՝ ի՞նչ անեմ․ ես գիտեմ, որ անընդհատ դա փորձելու են գրել․ Քոչարյանը՝ «Դիմադրության» շարժման ու իր քայլերի մասին

Ես որքան լինեմ՝ պետք է խոսեն այդ մասին։ Ասուլիսի ժամանակ ասաց ՀՀ երկրորդ նախագահ Ռոբերտ Քոչարյանը՝ արձագանքելով հարցին, թե կան խոսակցություններ, որ ինքը սպասում է մինչև Փաշինյանը տապալման փաստաթուղթը ստորագրի, նոր փորձի վերցնել իշխանությունը:

«Իրականում այդպես չէ. Եթե դա լիներ այդպես, ես չէի մասնակցի 2021 թվականի խորհրդարանական ընտրություններին, այլ կսպասեի՝ հեսա, ամեն ինչ կավիրվի, ես էլ այդ ավերակների վրա կգամ վարչապետ... ես մասնակցել եմ այդ ընտրություններին և տեսել եք քարոզարշավի ինտենսիվությունը՝ մասնակցել ենք անմնացորդ, փորձել ենք հասնել հաջողության, բայց չի ստացվել»,- ասաց նա:

Ռոբերտ Քոչարյանն ընդգծեց, որ չպետք է մոռանալ Դիմադրության շարժումը։ Նա պնդեց այն տեսակետը, որ եթե շարժումը չլիներ, ապա վաղուց բոլոր փաստաթղթերը ստորագրված կլինեին։

«Պատգամավորական կազմն ուղղակի տուն չէր գնում: Եվ դա մոռանալ ու ասել, թե սպասում է, որ ամեն ինչ կփլվի ու նոր կգա իշխանության, ուղղակի արդար ու ազնիվ չէ: Իսկապես արդար չէ»,- ասաց Քոչարյանը, ապա անդրադառնալով հարցի առաջին մասին՝ կրկին ասաց․ «Չեմ սպասում, լավ՝ ի՞նչ անեմ: Ես գիտեմ, որ անընդհատ դա փորձելու են գրել: Ուրեմն իրենք պետք է այնպես անեն, որ իրենց կայացրած որոշումների արդյունքում նման ընդվզումներ Հայաստանում տեղի չունենան: Սա է շատ պարզ լուծումը, որն իրենց աչքերով ու ականջներով գուցե ավելի ընկալելի լինի»։