«Եռաբլուրը մասնավոր գերեզմանոց չէ․․․» ասող Անդրանիկ Քոչարյանը ո՞նց հասկանա, որ որդի կորցրած ծնողի համար Եռաբլուրն իր տունն է դարձել․․․․
«Ես խստորեն դատապարտում եմ ԱԺ պատգամավոր կոչվող, բայց իրականում «Բայրաքթարի ամբասադոր» հանդիսացող մեր ընդդիմադիր գործընկերների կողմից՝ «Եռաբլուրում» իրենց որդիներին թաղած ծնողների վիշտը հեծնելու բոլոր փորձերը»,- ԱԺ Պաշտպանության և անվտանգության հարցերի մշտական հանձնաժողովի նիստում հայտարարեց ՔՊ-ական Վահագն Ալեքսանյանը, ով հայտնի է դարձել որպես «ուսապարկ»։
Հանձնաժողովի նախագահ Անդրանիկ Քոչարյանն էլ շարունակեց նրա խոսքն ու հայտարարեց, թե՝ «Եռաբլուրում մեր պահապան հրեշտակներն են»։
«Եռաբլուրը մասնավոր գերեզմանոց չէ․ այնտեղ թաղված են նաև մեր ընկերները․ եկեք շահարկման առարկա չդարձնենք»,- ասաց նա։
Իհարկե, Անդրանիկ Քոչարյանը ճիշտ է՝ Եռաբլուրը զավակ կորցրած ծնողների համար «մասնավոր գերեզմանոց» չէ․․․ բայց անդրանիկքոչարյանները հազիվ հասկանան, որ Եռաբլուրն այդ ծնողների համար ընդհանրապես գերեզմանոց չէ՝ այն նրանց համար դարձել է տուն, այն նրանց համար այն վայրն է, որտեղ հանգչում են իրենց հույսերը, որտեղ ապագան կորցնում է իր իմաստը, որտեղ պարզապես ապրում են նրանք։
Ամեն օր Եռաբլուր գնալու միտքն է նրանց ապրեցնում, որ այդ օրն էլ անցկացնեն իրենց որդիների հետ․․․ բայց այս ամենը չեն կարող հասկանալ անդրանիկքոչարյանները․․․
Ու այս տարբերությունն է հենց ծնողների ու իշխանության անդամների միջև․․
Ծնողները գնում են Եռաբլուր՝ իրենց որդիներ կարոտն առնելու սառած քարերին փարվելով, իսկ անդրանիկ-նիկոլական կազմը՝ «գալոչկաներ» դնելու և ֆոտոսեսիաներ անելու համար․․․
Արմինե Մկրտումյան
