Հուսոյի քրոջ 7-ամյա դուստրը` Արփին դեռ կարծում է, որ քեռին կռվում է...

«Ապրիլյանին մասնակցեց քաջաբար, եկավ տուն, դարձավ խոհարար, աշխատեց մինչեւ սկսվեց արյունալի պատերազմը։

Բերքանուշցի Հուսո Հովակիմյանը (Հուսիկ Հովակիմյան-խմբ.) կամավոր մեկնեց հենց սեպտեմբերի 21 ին, իսկ հոկտեմբերի 21 ին զոհվեց Հադրութի շրջանում, երբ փորձում էր դուրս բերել վիրավոր ընկերներին։

Հուսոյի քրոջ յոթնամյա դուստրը` Արփին դեռ կարծում է, որ քեռին կռվում է ու ցանկանում է միանալ իրեն, որ շուտ ավարտվի պատերազմը։

Արփին չի սխալվում, Հուսոն ու մյուս տղերքը Երկնքի զորքերում են կռվում եմր արժանապատվության եւ հավատի համար։

Ոչ մի վայրկյան չմոռանաք, թե ինչու զոհվեց Հուսոն եւ ինչի համար։ Երբեք»,-ֆեյսբուքյան իր էջում գրել է ԱԺ պատգամավոր Գեղամ Նազարյանը՝ կից հրապարակելով նաև լուսանկար:

NEWSPRESS.am-ը ներկայացնում է Հուսիկ Հովակիմյանի կենսագրությունը:

Կենսագրություն

Հայրենիքի պաշտպանության համար մղված մարտերում զոհվել է կամավորական Հուսիկ Հովակիմյանը: Ծնվել է 1996 թվականին, Արարատի մարզի Բերքանուշ գյուղում: 2014-2016 թթ.-ին ծառայել Արցախի հարավում՝ Ջրականում:

Ծառայության ընթացքում մշտապես աչքի է ընկել լավագույն կողմերով, արժանացել շնորհակալագրերի և պատվոգրերի: Հուսիկը մասնակցել է 2016-ի ապրիլյան քառօրյա առճակատմանը, 2020-ին՝ 44-օրյա պատերազմին:

Սեպտեմբերի 28-ին մեկնել է Ջրականի առաջնագիծ: Անզիջում պայքարել է ոսոխի դեմ, մասնակցել նաև Հադրութի համար մղված ծանր մարտերին: Հոկտեմբերի 21-ին հերթական մարտական առաջադրանքը կատարելիս մեր հերոսը զոհվել է:

Նրա շիրիմը հանգչում է Եռաբլուր զինվորական պանթեոնում։

Պարգևատրվել է

Պետական սահմանը պաշտպանելիս ցուցաբերած անձնական արիության և խիզախության համար ՀՀ նախագահի հրամանագրով՝ «Մարտական ծառայություն», իսկ ԱՆ նախագահի հրամանագրով հետմահու պարգևատրվել է «Արիության համար» մեդալներով:

Հավերժ փա՛ռք, հայրենիքի՛ պաշտպան...