Պետությունը պարտավոր չէ սուբսիդավորել այնքան, որ ապահովի բավարար եկամուտ․ Վահան Քերոբյան
Էկոնոմիկայի նախարար Վահան Քերոբյանը լրագրողների հետ զրույցում՝ անդրադառնալով խաղողագործների հետ հանդիպմանը, ասաց, որ քանդել այգիները արտահայտություն ինքը չի արել․ «Խեղում եք իմ ասածները, քանդել այգիները արտահայտություն իմ բերանից դուրս չի եկել, ես ասել եմ՝ ցանկացած մարդ պետք է ստեղծի մեծ արդյունք և եթե ունես փոքր հողակտոր, ակնհայտորեն չես կարող ստեղծել մեծ արդյունք»։
Նրա խոսքով՝ կամ պետք է մեծացնել հողատարածքները, կամ էլ զբաղվել այլ գործունեությամբ, որով հնարավոր կլինի ստեղծել մեծ արդյունք:
«Գիտեք, որ Կառավարությունն աշխատում է խոշորացնել գյուղատնտեսությունը միայն այն նպատակով, որ գյուղատնտեսությամբ զբաղվողները կարողանան ունենալ լավ եկամուտ: Եթե դու ունես փոքր հողակտոր, ակնհայտորեն, ինչ էլ անես, չես կարողանա ստանալ այնքան եկամուտ՝ ընտանիքդ պատշաճ կերպով պահելու համար, դա ինքնախաբեություն է: Ես ունեմ շատ ընկերներ՝ գյուղում ապրող, ովքեր թողել են գյուղատնտեսությունը և զբաղվում են այլ գործունեությամբ»,- ասել է նախարարը:
Քերոբյանի խոսքով՝ գուցե կոշտ է հնչում, բայց մարդիկ պետք է հասկանան, որ պետությունը պարտավոր չէ սուբսիդավորել այնքան, որ ապահովի իր համար բավարար չափով եկամուտ:
