Բջջային հեռախոս՝ տորթի մեջ, փաթեթ՝ տեսակցողի բերանում, USB լար. Արդարադատության նախարարությունը՝ ՔԿՀ-ներում հայտնաբերված արգելված իրերի մասին

Արդարադատության նախարարության քրեակատարողական ծառայության օպերատիվ, անվտանգության և պահպանության բաժինների ծառայողները շարունակում են պայքարը քրեակատարողական հիմնարկներում արգելված իրերի, թմրամիջոցների շրջանառության, ինչպես նաև թղթախաղերի դեպքերի բացառման ուղղությամբ:

Արդարադատության նախարարությունը ներկայացնում է սեպտեմբերի ընթացքում Հայաստանի քրեակատարողական հիմնարկներում հայտնաբերված թմրամիջոցների և այլ արգելված իրերի վերաբերյալ հաշվետու զեկույցը:

«Արթիկ» ՔԿՀ-ի 3-րդ դիտաշտարակի ծառայողի կողմից զեկուցվել է, որ արտաքին արգելագոտու կողմից բնակելի գոտուն է մոտենում հեռակառավարվող անօդաչու թռչող սարք (դրոն)։ Ծառայողները քրեակատարողական հիմնարկից մոտ 200 մետր հեռավորության վրա նկատել են քաղաքացու, որը հեռակառավարման վահանակով կառավարել է անօդաչու թռչող սարքը։ Քաղաքացին, տեսնելով իրեն մոտեցող ծառայողներին, դիմել է փախուստի, իսկ անօդաչու թռչող սարքն ընկել է ավտոճանապարհի հարակից հատվածում։

Դեպքի առթիվ ՀՀ ոստիկանության Շիրակի մարզային վարչության Արթիկի բաժնում կազմվել է արձանագրություն։ Զննությամբ պարզվել է նաև, որ թռչող սարքին ամրացված է եղել 3 բջջային հեռախոս։

«Վանաձոր» ՔԿՀ-ի ծառայողները անվտանգության ռենտգեն սարքի միջոցով զննության են ենթարկել քաղաքացու կողմից դատապարտյալի համար բերված հանձնուքը, որում առկա տորթի միջից հայտնաբերվել է բջջային հեռախոս:

«Գորիս» ՔԿՀ-ի ծառայողները զննության են ենթարկել դատապարտյալի համար որպես հանձնուք բերված սառնարանը, որի ստորին հատվածում պատրաստված թաքստոցից հայտնաբերվել են բջջային հեռախոսներ, բջջային հեռախոսի լիցքավորիչներ և մարտկոց, USB լար, ականջակալներ, բաժանորդային քարտեր:

«Արմավիր» ՔԿՀ-ի անվտանգության ապահովման բաժնի ծառայողները դատապարտյալների մոտ կարճատև տեսակցության եկած քաղաքացուհին ծառայողների պահանջով բերանից հանել է փաթեթ, որում առկա են եղել ընդհանուր 4,49 գրամ քաշով մուգ շագանակագույն առանձնացված զանգվածներ:

Տեսակցության եկած քաղաքացիներից մեկի մոտ հայտնաբերվել է մաստակով պատված փաթեթ՝ սպիտակ, բյուրեղանման զանգվածով:

Վերոնշյալ քրեակատարողական հիմնարկի աշխատակիցները հսկիչ տրանսպորտային կետում զննության են ենթարկել քաղաքացուն պատկանող Ford մակնիշի ավտոմեքենան, որի ձախ անվադողի վերևի հատվածում թաքցված է եղել մագնիսով ամրացված 2 փաթեթ, որոնցում հայտնաբերվել են բյուրեղանման, մեթամֆետամին տեսակի և շագանակագույն, հերոին տեսակի թմրամիջոցներին նմանվող զանգվածներ, ինչպես նաև բջջային հեռախոսի աքսեսուար և 1 wi-fi սարք։

«Արմավիր» ՔԿՀ-ի ծառայողներն զննության են ենթարկել կալանավորված անձին ուղղարկված հանձնուքը, որի արդյունքում շաքարավազի միջից հայտնաբերել են թմրամիջոցի նմանվող դարչնագույն զանգված։

Բոլոր դեպքերով նախաձեռնվել են քրեական վարույթներ, նշանակված են դատաքիմիական փորձաքննություններ: