Հայաստանի վարչապետն ու իշխող վարչախումբը չեն սպասարկում հայկական շահերը. ՀՅԴ գրասենյակ

Վճռականորեն դատապարտում ենք վերջին օրերին ՀՀ վարչապետի հրապարակային ելույթներում տեղ գտած խիստ վտանգավոր եւ հակազգային դիրքորոշումներն ու մոտեցումները, և այդ հիմքով Պրահայում Եւրոպական քաղաքական համայնքի գագաթնաժողովի շրջանակներում տեղի ունեցած բանակցությունների ընթացքում ձեռք բերված պայմանավորովածութիյունները: Այս մասին հայտարարություն է տարածել ՀՅԴ կենտրոնական գրասենյակը:

Ստորև ներկայացնում ենք հայտարարությունը․ 

«ՀՀ վարչապետը և իշխող վարչախումբը չեն սպասարկում հայկական շահերը և չունեն լեգիտիմ մանդատ Հայաստանի ու հայության անունից ստորագրելու որևէ փաստաթուղթ, որը հարցականի տակ է դնում Հայաստանի և Արցախի ինքնիշխանությունն ու հայ ժողովրդի շահերը։

– Միջազգային իրավունքի սկզբունքների և նորմերի կոպիտ ոտնահարմամբ, մասնավորապես ուժի կիրառման և ուժի սպառնալիքի կիրառման, ինչպես նաև Ադրբեջանի կողմից բացայայտ ագրեսիայի և Հայաստանի ինքնիշխան տարածքների բռնագրավման պայմաններում՝ սահմանազատման և սահմանագծման ուղղությամբ ցանկացած գործընթացի նախաձեռնում և իրականացում անընդունելի է։

– Արցախն իր ինքնիշխանությունը հռչակել է միջազգային և ներպետական իրավական կառուցակարգերին համապատասխան և այն սակարկման ենթակա չէ։

– Հայաստանի Հանրապետությունը որևէ պարագայում չի կարող հրաժարվել Արցախի ժողովրդի անվտանգության և ինքնորոշման իրավունքի երաշխավորի կարգավիճակից։ Նման քայլը անխուսափելիորեն կհանգեցնի Արցախի հայաթափմանն ու արցախահայության հայրենազրկմանը»,-ասված է հայտարարության մեջ։

ՀՅԴ գրասենյակը ակնկալում է, որ ԵԱՀԿ Մինսկի խմբի համանախագահ երկրները հավատարիմ կմնան իրենց ստանձնած մանդատին ու պարտավորություններին և հետևողական կլինեն հռչակված սկզբունքների հիման վրա Արցախի հիմնախնդրի կարգավորման հարցում։

«Կո՛չ ենք ուղղում հայ ժողովրդին չտրվել իշխանության կողմից սերմանվող պարտվողական տրամադրություններին, չհուսահատվել, համախմբվել ազգային ուժերի շուրջ և բեկում մտցնել իրավիճակի մեջ։ Դա ենթադրում է արմատական փոփոխություններ երեք հիմնական ուղղություններով.

ա) Հայաստան-Արցախ-Սփյուռք եռամիասնության վերականգնումով համահայկական զօրաշարժի իրականացում,

բ) պաշտպանության և անվտանգության հրատապ խնդիրների լուծում,

գ) կենսական զիջումները բացառելուն ուղղված արտաքին զօրակցության ապահովում»,-ասված է հաղորդագրության մեջ:

Այս առաջնահերթ խնդիրների լուծումը, ըստ գրասենյակի, հնարավոր է միայն ժողովրդի վստահությունը վայելող ազգային համաձայնության նոր կառավարության ձևավորման դեպքում․ «Մենք վճռական ենք, հստակ պատկերացնում ենք մեր անելիքները և կոչ ենք անում միասնական պայքարի»։