Թոռնիկներն առիթից օգտվել են, միջազգային կազմակերպություններից առևտուր են արել տատիկ-պապիկների քարտերով. դեմ չենք, բայց հետվճար չի իրականացվի․ Փաշինյան

«Սեպտեմբեր ամսին ունենք 1 մլրդ 200 մլն անկանխիկ գործարքներ, այսինքն՝ ամիսն ամփոփելուց հետո 120 մլն դրամ կվերադարձնենք մեր թոշակառուներին և նպաստառուներին»:

Այս մասին կառավարության նիստում ասաց Աշխատանքի և սոցիալական հարցերի նախարար Նարեկ Մկրտչյանը: Նա նաև նշեց, որ անկանխիկ գործարքներն ավելի շատ են եղել՝ 1 մլրդ 400 մլն դրամ, որի մի մասը կատարվել է ինտերնետի միջոցով։

«Այսօր կարող ենք արձանագրել, որ 3 հազար դրամ ամսական հետվճար է իրականացվում»,- ասաց նախարարը:

Փաշինյանն էլ փորձեց կատակել․

«Երբ 200 միլիոն տարբերությունն ուզում ենք վերլուծել, հասկանում ենք, որ թոռնիկներն առիթից օգտվել են և միջազգային առևտրային համակարգերից առևտուր են արել տատիկների և պապիկների քարտերով»,- ասաց Փաշինյանը:

Նա նկատեց, որ ըստ էության դեմ չեն թոռնիկների առևտրին, բայց զգուշացրեց, որ այդ պարագայում այդ թիվը հետվճարի մեջ չի մտնելու։

«Միայն Հայաստանի առևտրային հարթակներից կատարված գնումներն են փոխհատուցվելու»,- ասաց Փաշինյանը։