ՌԴ-ն ասում է՝ մենք կակտիվանանք․․․ տեսնենք, տեսնենք․ ՌԴ-ում Ալեն Սիմոնյանին հարցրել են, թե ինչու է իրենց քննադատում

ՀՀ Ազգային ժողովի նախագահ Ալեն Սիմոնյանը Մոսկվայի բոլոր հանդիպումներում ներկայացրել է տարածաշրջանում առկա իրավիճակը և ակնկալել արձագանք ռուս գործընկերներից։ Այս մասին Ալեն Սիմոնյանն ասաց Աժ-ում լրագրողների հետ զրույցում։

Նա հեգնանքով ներկայացրեց ՌԴ դիրքորոշումը։

«ՌԴ-ն ասում է՝ մենք կակտիվանանք»,- նշեց Ալեն Սիմոնյանը։

Լրագրողի ճշտող հարցին, թե երբ՝ նա անորոշ տարուբերեց գլուխը․ «Տեսնենք, տեսնենք, ինձնից դա հարցնելը ճիշտ չի, որովհետև այդ նույն հարցադրումը ես եմ անում այնտեղ»,-ասաց Սիմոնյանը։

Նա դժգոհեց ռուս գործընկերներից և նեղսրտեց, որ այնտեղ իրեն այնքան էլ լավ չեն ընդունել։

«Այնտեղ հաճախ ավելի շատ կենտրոնանում են, թե ես ինչ հարցազրույց եմ տվել և ինչու եմ քննադատել ու քննադատում, բայց ներողություն եմ խնդրում՝ ես դրա պատասխաններն ունեմ և ներկայացրել եմ։ Մենք ակնկալում ենք ՌԴ-ի ավելի լայն ներգրավվածությունը պրոցեսին»,- ընդգծեց նա։

Ալեն Սիմոնյանը նկատեց, որ Հայաստանը դեմ չէ ՌԴ ներգրավվածությանը և բոլոր ֆորմատներով համագործակցության համաձայնությունը տվել են։

«Ադրբեջանն է, որ Արցախում ռուս խաղաղապահների մանդատը մինչ օրս չի ստորագրել։ Ո՞րն է այս դեպքում մեր ռուս գործընկերների արձագանքը»,- հարցրեց Ալեն Սիմոնյանը։

Նա նաև նկատեց, որ ՀԱՊԿ-ից ևս ակնկալիքներ ունեն, սակայն ներգրավվածություն խնդրին ՀԱՊԿ-ի կողմից կարծես թե չի նկատվում։ 

«Ոչ թե մենք ենք ՀԱՊԿ-ից դուրս գալիս, այլ գուցե ՀԱՊԿ-ն է Հայաստանից դուրս եկել, ուղղակի չեն ուզում ասել մեզ, որ տրամադրություններս չգցեն»,- ասաց ԱԺ նախագահը։