Հայաստանում չկա իշխանություն, այլ կա ուժ, որը սպասարկում է Ադրբեջանի և Թուրքիայի շահերը․ Հայաստանի ժուռնալիստների միություն

Հանրությունը դեռ չի պատկերացնում, թե ինչ աղետ կարող է տեղի ունենալ, մանավանդ հաշվի առնելով այն, որ ապատեղեկատվությունը շատ է, շատ-շատ են զգոնությունը թուլացնող հայտարարությունները, շատ կեղծ օրակարգեր են ստեղծվում՝ ամենակարեւոր խնդրից՝ երկրի անվտանգությունից ուշադրությունը շեղելու համար։ Այս մասին հոկտեմբերի 17-ին տեղի ունեցած քննարկման ժամանակ ասաց Հայաստանի ժուռնալիստների միության նախագահ Սաթիկ Սեյրանյանը։

ՀԿ նախագահը պաշտոնական տեղեկատվությունը որակեց ապատեղեկատվություն՝ համոզմունք հայտնելով, որ այն շեղում է ուշադրությունը եւ ուղղված չէ թշնամու շահերին ծառայելուն։

Հայաստանի ժուռնալիստների միության նախագահը կոչ արեց ձեւավորել խմբեր, որոնք մատչելի լեզվով կհանդիպեն մարդկանց հետ, պարզ օրինակներով կբացատրեն աղետի ծավալը։

«Պետք է հեռանալ արեւմտամետ, ռուսամետ կամ այլ քարոզչական գործիքներից եւ կլիշեներից ու հասկանալ, թե որտեղ են մեր շահերը։

Իշխանությունների նպատակը հանրությանը մոլորեցնելն ու խառնաշփոթ ստեղծելն է։ Իսկ ո՞րն է Հայաստանի շահը։ Ո՞րն է անվտանգության այն համակարգը, որը կպաշտպանի Հայաստանի եւ Արցախի քաղաքացիներին։ Մենք պետք է ժողովրդին բացատրենք դա։ Բայց միայն հայտարարությունները բավարար չեն, քանի որ անգործության ժամանակ թե՛ ներքին, թե՛ արտաքին թշնամիներն իրենց գործը կանեն, իսկ մենք միայն կզբաղվենք նրանով, որ կբացահայտենք նրանց ստերը ու կդոփենք տեղում։ Պետք է ձեւավորենք մեր օրակարգը եւ համախմբվենք դրա շուրջը: Ռիսկերն ու մարտահրավերները շատ լուրջ են, իսկ այս ֆոնին Հայաստանի սուբյեկտայնությունը զրոյական է, Հայաստանի կարծիքը ոչ ոք չի հարցնում։

Փորձագետները խոսում են ցեղասպանության, էթնիկ զտումների, տեղահանության ռիսկերի մասին։ Եվ այս ֆոնին Հայաստանում չկա իշխանություն, այլ կա ուժ, որը սպասարկում է Ադրբեջանի, Թուրքիայի եւ այլ երկրների ու ուժերի շահերը»,- նշեց Սեյրանյանը։