Ես ասում էի՝ սպանում եք ինձ, գլխիս էին հարվածում․ Էդգար Ղազարյանը մանրամասներ է հայտնել իր ծեծի դեպքից

Հարվածների, սալջարդի տեղեր կան, բայց վիճակն այնպիսին չէ, որ ստացիոնար բուժման անհրաժեշտություն կա: Այս մասին, «Էրեբունի» ԲԿ-ի դիմաց լրագրողների հետ զրույցում ասաց հասարակական-քաղաքական գործիչ Էդգար Ղազարյանը՝ հիվանդանոցից դուրս գալուց անմիջապես հետո։

Հիշեցնենք, որ Էդգար Ղազարյանին իր տան շքամուտքի մոտ ծեծի էին ենթարկել անհայտ անձինք:

Նա գլխի շրջանում կարեր ունի, վնասվածքներ կան, բայց բժիշկները վիճակը նորմալ են գնահատել։

«Չնայած առաջարկեցին 1-2 օր հիվանդանոցում մնալ, բայց ես կարծում եմ՝ տանն ավելի հարմարավետ կլինի: Եթե անհրաժեշտ կլինի կդիմեմ բժիշկների օգնությանը»,-ասաց Ղազարյանը:

Նա պատմեց, որ դեպքը տեղի է ունեցել հենց իրենց շենքի բակում։ Էդգար Ղազարյանն առավոտյան վարսավիրանոց էր գնացել և վերադառնում էր տուն։ Ղազարյանն անգամ նրանց կողքից անցնելիս՝ բարևել է։

«Երկու հոգի ինձ այնտեղ սպասում էին, ակնհայտ հետևել էին իմ շարժին: Միանգամից հարձակվեցին երկու հոգի, առանց շատ խոսելու, միայն հայհոյանքներով սկսեցին տարբեր տեղերից հարվածել: Ես նույնիսկ չհասցրեցի դիմադրություն ցույց տալ: Գցեցին գետնին ու շարունակեցին հարվածել, հատկապես գլխի շրջանում: Ակնհայտ, իրենց մտադրությունը նույնիսկ կարող էր սպանելը լինել, որովհետև ես ասում էի՝ սպանում եք ինձ: Դրանից հետո անշարժացա: Դրանից հետո իրենք գնացին: Ես կանգնեցի շփոթված, պատահաբար մի մեքենա եկավ, ճանաչեցին ինձ: Ասաց՝ պարոն Ղազարյան, ես ճանաչում եմ ձեզ, ի՞նչ է եղել, եկեք ձեզ տանեմ հիվանդանոց, արնաշաղախ եք: Տեղափոխեցին «Շենգավիթ» ԲԿ, այնտեղից էլ շտապօգնության մեքենայով բերեցին «Էրեբունի» ԲԿ»,- պատմեց Էդգար Ղազարյանը:

Նա հավելեց, որ հարձակվողները որևէ պահանջ չեն ներկայացրել, որևէ խոսք չեն ասել.

«Ես վերջին շրջանում որևէ մեկի հետ անձնական խնդիրներ, որևէ մեկի հետ վեճ, վիճաբանություն չեմ ունեցել: Ակնհայտ է, որ սա բացառապես իմ քաղաքական գործունեությամբ պայմանավորված բան է: Վերջին շրջանում ես ստացել եմ սպառնալիքներ հիմնականում «ֆեյք» պրոֆիլներից, որոնց առանձնապես ուշադրություն չեմ դարձրել: Մինչ այդ անցյալ ունեցել եմ վիրավորանք-սպառնալիք, դիմել եմ ոստիկանություն, քրեական գործեր են հարուցվել, հետո քրեական օրենսգրքի 137.1 հոդվածը հանելուց հետո կարճվել են: Վստահ եմ, որ բացառապես քաղաքական պահանջներով է: Սա իշխանության պատվեր է՝ ֆիզիկապես ոչնչացնելու մտադրությամբ»,-ասաց Ղազարյանը:

Նա նշեց, որ երիտասարդները մոտ 30 տարեկան էին: Ղազարյանն անգամ կատակեց․ «Մեկը մորուքով էր, բայց չեմ կարծում՝ Նիկոլ Փաշինյանը լիներ»,-ասաց Ղազարյանը:

Նա ընդգծեց, որ արդեն նախնական ցուցմունք տվել է տեղի ունեցածի մասին, հիմա էլ սպասում է, որ տան մոտ, դեպքի վայրում քննչական գործողություններ կլինեն. «Ըստ իրենց տեղեկությունների արդեն վարույթ է սկսվել: Կոնկրետ մեր շենքի մոտակայքում կան տեսանկարհանող սարքեր, հուսով եմ՝ կօգտվեն դրանցից: Այդ պահին աղբահանության ծառայության աշխատակիցներն էլ էին այնտեղ իրենց մեքենայով: Իրենք նաև ականատեսներ են: Միանգամից ինձ գցել են գետնին, ես չհասցրեցի իրենց տեսնել, ուշադրություն էլ չեմ դարձրել, որ փորձեմ իրենց վիզուալ ֆիքսել:

Հարցին՝ շարունակելո՞ւ է նույն ակտիվությամբ պայքարել, նա արձագանքեց. «Չէ, մի քիչ ավելի կակտիվացնեմ, որովհետև այդպես թողնել չի կարելի»: