Քերոբյանը խայծ նետեց... թշնամին գրոշի դիմաց ՀՀ քաղաքացիություն կստանա, իսկ մարդիկ սննդակարգ են քննարկում

Էկոնոմիկայի նախարար Վահան Քերոբյանը հոկտեմբերի 19֊ին շատ կարևոր ու մտահոգիչ տեղեկություն հայտնեց. 

Կառավարությունը մշակել է հայեցակարգ` օտարերկրացիներին ՀՀ քաղաքացիություն տալու վերաբերյալ։ Ըստ այդմ` օտար երկրի ներկայացուցիչը, ով 150 հազար դոլարի ներդրում կանի` կստանա քաղաքացիություն։

Ընդ որում` այս տարբերակով Հայաստանի քաղաքացի կարող է դառնալ նաև ազգությամբ թուրք կամ ադրբեջանցի ներդրողը։

Քերոբյանը հայտարարեց, թե մեր ներքին «անվտանգությունը կչեզոքացնի» վտանգը, բայց միևնույն ժամանակ չբացառեց, որ շատ հնարավոր է թուրքերն ու ադրբեջանցիները, ներդրում անելով, շուտով դառնան «մեր համերկրացիները»։

Այս հայտարարությունը, սակայն, այնքան չմտահոգեց մեր երկրի «հայ» քաղաքացիներին, որքան այն, որ կառավարության կողմից հատուկ սննդակարգ կկազմվի, քանի որ պարզվում է՝ «մեր խնդիրը սխալ ուտելու մեջ է»...

Ինչպես պապս կասեր՝ «մեծ էշը ախոռում թողած, բոլորն քուռակի հետևից ընկան»...

Արդեն նույն օրը՝ երեկոյան ու հաջորդ օրը՝ վաղ առավոտյան, սոցցանցերը ողողվեցին գրառումներով ու Քերոբյանի հիմար, անհեթեթ և, ի վերջո, անիրատեսական արտահայտությամբ...

Փաստորեն, ուտել-չուտելու հարցն այն մեծ խնդիրն էր, որ ամբողջ երեկոյան ու գիշեր տանջել էր հայ հասարակությանը:

Ու ոչ մի տառ կամ բառ այն մասին, թե թուրքերը կարող են դառնալ ՀՀ քաղաքացի` դրա դիմաց վճարելով մի քանի գրոշ...

Ակնհայտ է, որ Քերոբյանի երկրորդ հայտարարությունը ուտել-չուտելու մասին, պարզապես խայծ էր` մարդկանց ուղեղը բթացնելու և նրանց իրական խնդրից հեռացնելու համար։

Բայց խնդիրը ո՛չ թե Քերոբյանի հայտարարության մեջ է, այլ, ինչպես կասեր դասականը, մարդկանց ուղեղի աղքատության, որովհետև նրանք բոլորը շատ արագ կուլ տվեցին Քերոբյանի նետած խայծը, ինչպես միշտ ու սովորաբար լինում է ամեն մի լուրջ ու օրհասական հայտարարության ժամանակ կամ որևէ մտահոգիչ իրավիճակում։

Եվ ընդհանրապես, ինչպե՞ս կարելի է չհասկանալ, որ Քերոբյանները, Արզաքանցյանները, Աննա֊Հակոբյաններն ու նրանց նման էլի մի քանիսը, զուտ խայծ նետելու և մարդկանց հիմարացնելու համար են։

Ցավալի է, որ ժողովրդի մեջ հենց այդ մասսան, այդ զանգվածն է կարծիք ձևավորում ժողովրդի մասին՝ հայի «պայքարող տեսակից», հային վերածելով ստամոքսապաշտ ու բթամիտ տեսակի:

Ի վերջո, իսկապե՞ս որևէ մեկը մտածում է, թե երբ թուրքերը ներդրումներ անեն, դառնան ՀՀ քաղաքացիներ, մենք բոլորս լավ ենք ապրելու... Թուրքը հային վերացնող տեսակ է: Նրա ինչի՞ն է պետք հայը: Ինչպես բոլոր ժամանակներում, նրանք ձգտում են տիրանալ տարածքին ու այդ տարածքը նրանց պետք է առանց հայերի:

Ալիևն անգամ չի էլ թաքցնում իրենց ցանկություններն ու սպառնում է, որ եթե մեր կամքով չտանք իրենց «Սևանն ու Էրիվանը», ապա ուժով կվերցնեն ու ոչ մի հայ չի մնա...

Փոխարենը մենք նրանց 150 հազար դոլարի դիմաց քաղաքացիություն ենք տալիս ու «էստի համեցեք» անում...

Սա ոչ թե Քերոբյանի հիմարությունն է, այլ այս իշխանության կեղտոտ ծրագիրն ու մեր ազգի ողբերգությունը, որ թացը չորից չի ջոկում, կարևորը թողած՝ ընկնում է անկարևորի հետևից... 

Իրականում անհնար է շարքային քաղաքացու սննդակարգ մշակել ու վերահսկել այն, փոխարենը շոշափելի են թուրքի (ադրբեջանցու) հասցրած վնասները: Ու մինչ բոլորը երևակայության գիրկն են ընկել ու ծաղրում են Քերոբյանին, իրական կյանքում թշնամին կրակում է,  կրակում է ամեն Աստծո օր...

Անցնող կեսգիշերին ևս ադրբեջանցիները կրակել են ականանետներից... դե ծափ տվեք ու ծիծաղեք...

Արմինե Մկրտումյան