ՊՆ-ն գիտի կոնկրետ տեղանքներ, որտեղ զինծառայողների դիեր կան, սակայն Ադրբեջանը թույլ չի տալիս մարմինները հանել. ՄԻՊ

Ադրբեջանը դեռևս չի տալիս իր համաձայնությունը, որ հայկական կողմը հանի զինծառայողների դիերը։ Այս մասին այսօր հայտարարեց ՀՀ մարդու իրավունքների պաշտպան Քրիստիննե Գրիգորյանը:

Անդրադառնալով հարցին, թե Նիկոլ Փաշինյանը երկու օր առաջ հայտնեց 29 անհետ կորած զինծառայողի մասին, դրանից երկու օր առաջ Աստանայում՝ 30, ինչո՞վ է պայմանավորված թվերի տարբերությունը, ՄԻՊ-ը պատասխանեց, որ սեպտեմբերի 13-14-ին Ադրբեջանի հարձակման ժամանակ զոհված հայ զինծառայողների մարմինների նույնականացման, տարբեր օրերին ռազմագերների հայրենադարձման արդյունքում անհետ կորած զինծառայողների թիվը փոխվում է։

«Ճշտումներ կարող են լինել, սա նորմալ գործընթաց է»,- ասաց նա։

Նա նշեց նաև, որ, օրինակ, սեպտեմբերի 16-ի դրությամբ իրենց գրասենյակ զինծառայողների ընտանիքների կողմից 40-ից ավելի դիմումներ էին ստացել, պնդում էին, որ իրենց հարազատն անհետ կորած է։

«Այդ ընթացքում ավելի քան 130 մարմին է փոխանցվել, նույնականացման գործընթացում այս թվերը փոփոխվեցին,- ասաց Մարդու իրավունքների պաշտպանը։

Քրիստիննե Գրիգորյանի խոսքով՝ Պաշտպանության նախարարությունը գիտի կոնկրետ տեղանքներ, որտեղ զինծառայողների մարմիններ են գտնվում, սակայն այս պահի դրությամբ ադրբեջանական կողմը դեռևս չի տալիս իր համաձայնությունը, որպեսզի հայկական կողմը հանի մարմինները։

«Մեր տեղեկատվության համաձայն՝ ադրբեջանական կողմը դեռևս խոչընդոտում է և թույլ չի տալիս մարմինները հանել»,- ասաց Գրիգորյանը։