Խմած վարորդն աղբահանության մեքենայով կողաշրջվել է. տնօրինությունն իմացել էր, որ նրա հանգստի ժամն է և խմած է, բայց ստիպել էր քշել

Այսօր՝ հոկտեմբերի 20-ին, ժամը 02:39-ին Ճգնաժամային կառավարման ազգային կենտրոն ահազանգ է ստացվել, որ Երևանի Խորենացի փողոցի թիվ 168 հասցեի մոտակայքում տեղի է ունեցել ՃՏՊ, ավտոմեքենան կողաշրջվել է. առկա է վառելիքի արտահոսք:

Պարզվել է, որ «KamAZ» մակնիշի ավտոմեքենան (վարորդ՝ Խ. Վ.) բախվել է ծառին, գազատար խողովակին (առկա է արտահոսք) և էլ․ սյանը, այնուհետև կողաշրջվել՝ բախվելով մոտակայքում կայանած «VAZ-2106» (վարորդ՝ Խ. Հ.) և «Mini Cooper» (վարորդ՝ Ա. Դ.) մակնիշների ավտոմեքենաներին:

Ավելի ուշ NEWSPRESS.am-ը պարզեց, որ «KamAZ» մակնիշի ավտոմեքենան պատկանում է աղբահանության ՊՈԱԿ-ին։ Վերջինիս վարորդը ղեկին է եղել ոչ սթափ վիճակով։

Մեր տեղեկություններով՝ վարորդն այդ օրն արդեն ավարտած է եղել իր աշխատանքը և ցանկացել է պարզապես ընտանեկան միջավայրում լիցքաթափվել։ Սակայն նրան շտապ աշխատանքի են կանչել։

Նա, իհարկե, հրաժարվել է նման վիճակով աշխատանքի դուրս գալուց, սակայն ՊՈԱԿ-ի վերադաս մարմինները նրան սպառնացել են, որ եթե դուրս չգա աղբահանության՝ կհեռացնեն աշխատանքից։

NEWSPRESS.am-ի տեղեկություններով՝ վերջին շրջանում նման սպառնալիքներ հաճախակի են լինում։

ՊՈԱԿ-ի մեքենաները, մեկը մյուսի հետևից, անսարքության պատճառով խոտանվում են, իսկ վարորդներից շատերն էլ աշխատանքից դուրս են եկել։ Ստացվել է այնպես, որ ՊՈԱԿ-ն այսօր ո՛չ ռեզերվային մեքենաներ ունի (NEWSPRESS.am-ն այս խնդրին արդեն անդրադարձել է), ո՛չ էլ անգամ ռեզերվային վարորդներ։

Նրանք, ովքեր դեռևս ՊՈԱԿ-ում են, պարզապես այլընտրանքային աշխատանք չունեն։ «Աղբահանություն և սանիտարական մաքրում» ՊՈԱԿ-ի ղեկավարությունն էլ, տնօրեն Հովհաննես Մանուկյանի գլխավորությամբ, սպառնում է մնացած աշխատողներին։

Թերևս նաև սա է եղել պատճառը, որ խմած վարորդը սկզբում հրաժարվել է, հետո աչքի առաջ ունենալով գործազրկությունը, ի վերջո որոշել է նստել ղեկի առաջ: 

Արդյունքում կողաշրջել է մեքենան և իր մեքենայով ընկել 2 այլ փոքր մարդատարների վրա․․․

Այս ամենից բացի, մեզ հասած տեղեկություններով, պարզվում է, որ ՊՈԱԿ-ի ավելի քան 50 մեքենայից ոչ մեկի արգելակային կոճղակները (Тормозные колодки) չեն գործում։ Այլ կերպ ասած՝ մեքենաները շահագործվում են «Աստծո հույսով»:

Թե ինչու են մեքենաները հասել այս վիճակին, թերևս ունի իր բացատրությունը, որին, ի դեպ, կրկին անդրադարձել ենք մեր նախորդ հրապարակումներում։

Բանն այն է, որ անսարք մեքենաները վերանորոգելու փոխարեն, դրանք քշում են այնքան, մինչև ինչ-որ մի օր տեղից չի շարժվում։ Մեքենաները որպես խոտան կանգնեցնում են ՊՈԱԿ-ի ավտոպարկում, իսկ ավտոմասերը՝ վաճառում։

Մեր աղբյուրի փոխանցմամբ՝ օրերս էլ, օրը ցերեկով, հենց վարորդների աչքի առաջ, 10GU101 համարանիշով «Մերսեդես» մակնիշի մեքենա է մուտք գործել ավտոպարկ։ 

Ականատեսները նկատել են, որ մեքենայի մեջ դրվել է 4 տուփ, որոնց մեջ, ըստ նրանց կասկածների, եղել են ավտոմասեր։ Այս կասկածներն առաջացել են այն պատճառով, որ «Մերսեդեսով» ավտոպարկ մուտք գործած քաղաքացիները գումար են փոխանցել տուփերի դիմաց։

Այլ կերպ ասած՝ ՊՈԱԿ-ի տնօրեն Հովհաննես Մանուկյանն աղբահանության ՊՈԱԿ-ն իր համար դարձրել է բիզնես-աղբյուր ու անխնա քամում է, մինչև վերջնականապես այն կվերածվի խոտանված մեքենաների գերեզմանոցի։

Իսկ քաղաքապետը դեռ լուռ է ու անհաղորդ․․․

Արմինե Մկրտումյան