Մեզ համար անսպասելի երրորդ երկրներն աջակցում են Նախիջևան տանող ճանապարհի ադրբեջանական մեկնաբանությանը․ ԱԳՆ

Մենք տեսնում ենք, որ երրորդ երկրները, երբեմն նույնիսկ մեզ համար անսպասելի երրորդ երկրները, աջակցում են այս ճանապարհի ադրբեջանական մեկնաբանությանը: Այս մասին Իրանի ԱԳ նախարարի հետ ճեպազրույցում ասել է Հայաստանի արտգործնախարար Արարատ Միրզոյանը։ Նա նշել է, որ այստեղ նույնպես Հայաստանը հանդիպում է Ադրբեջանի անզիջում պահվածքին։

«Մենք բազմիցս նշել ենք, որ արտատարածքային կարգավիճակով միջանցք բացելու մասին խոսք լինել չի կարող։ 2020 թվականին Լեռնային Ղարաբաղի դեմ ագրեսիայից հետո ընդունված եռակողմ հայտարարության համաձայն՝ ռազմական գործողությունները դադարեցվել են։

Այս հայտարարությամբ, ինչպես նաև հարակից այլ հայտարարություններով, ընդգծվել է տրանսպորտային և տնտեսական ենթակառուցվածքների բացման կարևորությունը: Այս հայտարարություններում խոսվում է նաև Նախիջևանի և Ադրբեջանի հիմնական մասի միջև տրանսպորտային հաղորդակցությունների հաստատման մասին։ Մենք բազմիցս հայտարարել ենք, որ պատրաստ ենք ճանապարհներ բացել Ադրբեջանի ուղևորափոխադրումների և բեռնափոխադրումների համար, ամրագրել այն դիրքորոշումը, ըստ որի՝ բացվող ենթակառուցվածքը պետք է մնա այն երկրների ինքնիշխանության ներքո և գործի այն երկրների օրենսդրությամբ, որ երկրների տարածքովդրանք անցնում են. դա վերաբերում է նաև Նախիջևանից Ադրբեջանի հիմնական հատված տանող ճանապարհին, որով կարող են տեղաշարժվել նաև երրորդ երկրների քաղաքացիները։

Մենք կարծում ենք, որ այս հարցում կարող են լինել ավելի արդիական լուծումներ, այդ թվում՝ բեռների հայտարարագրում եւ այլն։ Բայց հիմնական պահանջն այն է, որ ճանապարհը պետք է մնա մեր ինքնիշխանության ներքո եւ գործի մեր օրենսդրությանը համապատասխան»,- ասել է Միրզոյանը։