Արցախի ժողովրդի ինքնորոշման իրավունքը քննարկման ենթակա չէ․ պետք է պայքարենք՝ ապրելով Արցախում․ Արայիկ Հարությունյան

Մենք պետք է սթափ գնահատենք իրավիճակը, մեզ համար նախընտրելի քաղաքական կուրս ընտրենք՝ առանց Արցախի ժողովրդի ինքնորոշման իրավունքի միջազգային նորմից հրաժարվելու։ Արցախի Հանրային հեռուստատեսությանը տված հարցազրույցի ժամանակ ասել է Արցախի Հանրապետության նախագահ Արայիկ Հարությունյանը՝ հավելելով, որ Արցախի ժողովրդի ինքնորոշման իրավունքը քննարկման ենթակա չէ։

Արայիկ Հարությունյանը ևս մեկ անգամ շեշտում է, որ Արցախն Ադրբեջանի կազմում լինելու մասին երբևէ չեն էլ մտածում։

Նա նկատում է, որ Արցախյան պատերազմը ծանր էր և դաժան, բայց Արցախի Հանրապետությունն այսօր դեռ ֆակտո կա։

«Արցախի Հանրապետությունն այսօր դե ֆակտո շարունակվում է ղեկավարվել Սահմանադրությամբ, օրենքներով, երկիրն ապրում է նույն տրամաբանությամբ, իհարկե, ունենալով մարդկային, տարածքային մեծ կորուստներ, որը մեզ համար շատ ցավալի է, դրա համար պատկերացնել Արցախն այլ կարգավիճակում՝ անհնար է»,- ասաց Արցախի Հանրապետության նախագահը՝ հավելելով, որ դե ֆակտո անկախությունը եղել է, կա և կմնա։

Հարցին՝ արդյոք իրենց այս ցանկությունն աշխարհի համար հասկանալի՞ է, արդյոք աշխարհին կարողանո՞ւմ են հասկանալի լեզվով հիմնավորել, թե ինչու Արցախը չի կարող լինել Ադրբեջանի կազմում, Արայիկ Հարությունյանը պատասխանեց. «Այսօր շատ ավելի է բարդացել, քանի որ միջազգային խաղացողները, որոնք փորձում են Հայաստան-Ադրբեջան «խաղաղության պայմանագրի» հետ կապված իրենց ծառայությունները մատուցել, ստորադասում են արցախյան խնդիրը, այդքան էլ նպաստավոր առաջարկություններ չեն ներկայացնում։ Բայց դա չի խանգարում մեզ իրացնելու ՄԱԿ-ի կանոնադրության ազգերի ինքնորոշման նորմը և մեր պայքարը լինելու է դրա շրջանակներում։ Դա զիջելու որևէ ցանկություն չունենք»,- ընդգծեց Արայիկ Հարությունյանը։

Նա շեշտեց, որ պայքարելու են Արցախի ժողովրդի ինքնորոշման իրավունքի կարևոր այդ նորմի շրջանակներում։ 

«Մենք պետք է պայքարենք, բայց առաջին հերթին ապրելով Արցախում։ Իմ ընտանիքն Արցախում է ու ես շարունակելու եմ իմ ընտանիքով ապրել Արցախում»,- ասաց Արցախի նախագահը։